نەتەنیاهۆ هەڕەشەی توند لە ئێران دەکات

 نەتەنیاهۆ هەڕەشەی توندی وەڵامدانەوە لە ئێران دەکات
بێنیامین نەتەنیاهۆ، سەرۆک وەزیرانی ئیسرائیل، هۆشدارییەکی زۆر توندی دایە تاران لەبارەی هەر هەوڵێک بۆ تێکدانی پرۆسەی هەڵبژاردنەکانی 27ی ئەم مانگە. هاوکات بەپێی ڕاپۆرتە ڕۆژنامەوانییەکان، پلانی ئۆپراسیۆنی سەربازی بۆ بەئامانجگرتنی دامەزراوە ئەتۆمییەکان و کەرتی وزەی ئێران ئامادە و تاوتوێ دەکرێت.
نەتەنیاهۆ ڕای گەیاند کە زانیاریی وردیان هەیە لەسەر نیازی تاران بۆ بەکارهێنانی درۆن و مووشەک، هۆشداریشی دا کە وەڵامی ئیسرائیل وێرانکەر دەبێت لە کاتی دەستوەرداندا، بە جۆرێک دەسەڵاتدارانی ئێران تەنانەت توانای پێشبینیکردن و بیرکردنەوەیشیان بۆ قەبارەی کاردانەوەکە هەرگیز نابێت.
لەلایەکی دیکەوە، گۆڤاری ئەتلەنتیک ئاشکرای کرد کە دۆناڵد ترەمپ بە ڕاوێژ لەگەڵ نەتەنیاهۆ، تاوتوێی لێدانی سەربازیی ئێران دەکات. ئەم پلانە بە ئامانجی تێکشکاندنی بنچینەی ئابووری و سەربازیی ئەو دەسەڵاتەیە، تاکو بە ناچاری تاران بگەڕێتەوە سەر مێزی دانوستان و گفتوگۆ.