ئێران هەزار سەربازی ئەمریکا بەدیل دەگرین

ئەمڕۆ هەینی چواری ئەیلوولی 2026، موحسین ڕەزایی ئەمینداری ئەنجوومەنی باڵای ئاسایشی نەتەوەییی ئێران، هۆشدارییەکی توندی دایە واشنتن و ڕای گەیاند کە لە ئەگەری هەر هێرشێکی ئەمەریکا بۆ سەر وڵاتەکەی، تەنیا لە یەکەم هەفتەدا زیاتر لە هەزار سەربازی ئەمەریکی بەدیل دەگرن، هاوکات دووپاتی دەکاتەوە کە ئەمەریکا هیچ بژاردەیەکی تری جگە لە ڕێککەوتن لەبەردەمدا نییە
لە لێدوانێکدا کە میدیاکانی ئێران بڵاویان کردووەتەوە، موحسین ڕەزایی ئەمینداری ئەنجوومەنی باڵای ئاسایشی نەتەوەیی ڕای گەیاندووە کە ئێران بەپێی توانا و ئیمکانیاتەکانی خۆی مامەڵە لەگەڵ هەر هێرشێکی سەربازیی ئەمەریکادا دەکات. دووپاتی کردەوە کە ئەگەر واشنتن هێرش بکات، ئەوا هێزەکانیان توانای ئەوەیان هەیە لە یەکەم هەفتەی ڕووبەڕووبوونەوەکەدا، لایەنی کەم هەزار سەربازی ئەمەریکی وەک دیل بگرن.
سەبارەت بە دۆخی دانوستانەکان و گوشارەکان، ڕەزایی ئاماژەی بەوە داوە کە ئەمەریکییەکان ئێستە لە کۆتا خولەکەکاندان و ڕووبەڕووی گوشارێکی زۆر توند بوونەتەوە. پێی وایە تەنانەت ئەگەر دانوستانەکانیش بۆ چەند ڕۆژێکی تر درێژ بکرێنەوە، هیچ گۆڕانکارییەکی سەرسوڕهێنەر ڕوو نادات، چونکە سەرجەم دەرگاکان بە ڕووی ئەمەریکادا داخراون و تەنیا یەک بژاردەیان هەیە کە ئەویش ڕێککەوتنە لەگەڵ ئێران.
لە وەڵامی ئەو هەڕەشانەی ئەمەریکاش کە دەڵێت بژاردەی سەربازییان لەسەر مێزە ئەگەر دانوستانەکان شکست بهێنن، ڕەزایی ئەو لێدوانانەی بە بێبنەما وەسف کرد و دووپاتی کردەوە کە ئەمەریکییەکان توانای هێرشی سەربازییان بۆ سەر ئێران نییە، هەروەها ناتوانن سزاکان لەوە توندتر بکەنەوە، بۆیە هیچ چارەسەرێکی تریان جگە لە گەیشتن بە ڕێککەوتن نییە.