سعودیە بە توندی هاتە دەنگ

وەزارەتی دەرەوەی سعوودیە بە توندی سەرکۆنەی بەردەوامیی هێرشە توندەکانی ئێران بۆ سەر وڵاتانی کوێت، بەحرەین و ئوردن دەکات و پشتگیریی تەواوی خۆی بۆ ئەو وڵاتە هاوسێیانە دووپات دەکاتەوە.
​ئەمڕۆ شەممە، 18ـی 7ـی 2026، وەزارەتی دەرەوەی سعوودیە لە بەیاننامەیەکدا ڕایگەیاند، هێرشەکانی ئێران بۆ سەر ئەم وڵاتە هاوسێیانە، بە تەواوی پێچەوانەی یاسا نێودەوڵەتییەکان و بنەماکانی هاوسێیەتیی باشە، و شانشینی سعوودیە پاڵپشتی لە هەر ڕێکارێک دەکات کە ئەم وڵاتانە بۆ پاراستنی خۆیان دەیگرنە بەر.
​هەروەها وەزارەتی دەرەوەی سعوودیە دژایەتیی تەواوی خۆی بەرامبەر هێرشە ئاشکراکانی ئێران بۆ سەر ژێرخان و شوێنە مەدەنی و گرنگەکان نیشان دا؛ لەوانەش بەئامانجگرتنی یەکێک لە وێستگەکانی بەرهەمهێنانی کارەبا و پاڵاوتن و شیرینکردنی ئاو لە دەوڵەتی کوێت. 
لە کۆتاییدا سعوودیە جەختی لەسەر گرنگیی ڕاگرتنی دەستبەجێی سەرجەم جۆرەکانی پەرەسەندنی سەربازی کردەوە، بە مەبەستی پاراستنی ئاسایش و سەقامگیریی وڵاتان و گەلانی ناوچەکە.