قائانی هەڕەشەی توند دەکات

هاوكات لەگەڵ بەڕێوەچوونی رێوڕەسمی بەخاكسپاردنی عەلی خامنەیی رابەری پێشووی ئێران، كە لە 28ی شوباتی رابردوو لە هێرشێكی ئاسمانیی ئەمەریكا و ئیسرائیل لە تاران كوژرا، ئیسماعیل قائانی فەرماندەی فەیلەقی قودسی ئێران چەند لێدوانێكی توند دەدات و بەڵێنی تۆڵەكردنەوە لە كوشتنی خامنەیی دەدات.
وەك ئاژانسی "تەسنیم"ی ئێران سەر بە سوپای پاسداران بڵاوی كردەوە، قائانی بەڵێنی تۆڵەكردنەوەی بۆ كوژرانی عەلی خامنەیی رابەری پێشووی ئێران دا، داوای سازكردنی رێوڕەسمێكی ماڵئاواییكردنی نائاسایی لە عێراق كرد، بۆ ئەوەی هێڵی سووری داواكردنی تۆڵەكردنەوە لە رشتنی خوێنی رابەری پێشوو دیارتر بێت.
بڵاوكردنەوەی پەیامەكەی قائانی لە دوای ئەو هەواڵانە دێت كە حكوومەتی عێراق كۆتێكی توندی تەناهی و سیاسی بەسەر پێوەندییەكانی عێراق و ئێران سەپاندووە، رێوڕەسمی بەخاكسپاردنی خامنەیی تەنیا لە هەردوو پارێزگای نەجەف و كەربەلا سنوودار كردووە و رەتی كردووەتەوە كە لە بەغدای پایەتەخت بێتە سازكردن، راشكاوانە بە ئێرانی گوتووە كە نابێت هیچ فەرماندەیەكی سەربازیی ئێران، لە سەروویانەوە قائانی، بەشداری لە رێوڕسەمەكان لە عێراق بكەن.