ناوەڕۆکی ڕێککەوتنەکە ئاشکراکرا

ناوەڕۆکی ڕێککەوتنی نێوان ئێران و ئەمریکا ئاشکراکرا. 
میدیای فەرمی ئێران بڕگەکانی ئەو ڕێککەوتننامەیەی بڵاوکردەوە کە بڕیارە واژۆ بکرێت:
١- ڕاگرتنی دەستبەجێ و هەمیشەیی شەڕ لە سەرجەم بەرەکانی شەڕدا، لەوانەش لوبنان.
٢- پابەندبوونی ئەمریکا بە دەستوەرنەدان لە کاروباری ناوخۆی ئێران و ڕێزگرتن لە سەروەریی کۆماری ئیسلامیی ئێران.
٣- هەڵگرتنی تەواوەتی گەمارۆی دەریایی.
٤- پابەندبوونی ئەمریکا بە کشانەوەی هێزەکانی لە دەوروبەری ئێران.
٥- کردنەوەی گەرووی هورمز لە ماوەی ٣٠ ڕۆژدا بە هەماهەنگی لەگەڵ ئێران.
٦- ڕاگرتنی ئەو سزایانەی لەسەر فرۆشتنی نەوت و بەرهەمە پترۆکیمیاییەکان دانراون، و پێدانی مافی دەستڕاگەیشتنی تەواو بە ئێران بە سەرچاوە داراییەکانی خۆی.
٧- پێشکەشکردنی پلانێک لەلایەن ئەمریکا و هاوپەیمانەکانییەوە بۆ ئاوەدانکردنەوەی ئێران بە بڕی کەمتر لە ٣٠٠ ملیار دۆلار نەبێت.
٨- ٦٠ ڕۆژ دانوستان بۆ گەیشتن بە ڕێککەوتنێکی کۆتایی لەسەر بنەمای دۆسیەی ئەتۆمی و هەڵگرتنی تەواوەتی گەمارۆ سەرەتایی و لاوەکییەکان، و بڕیارەکانی ئەنجومەنی ئاسایشی نەتەوە یەکگرتووەکان و ئەنجومەنی پارێزەرانی ئاژانسی نێودەوڵەتی وزەی ئەتۆمی.
٩- دووپاتکردنەوەی پابەندبوونی ئێران بە پەیماننامەی قەدەغەکردنی بڵاوکردنەوەی چەکی ئەتۆمی (NPT) بۆ بەرهەمنەهێنانی چەکی ئەتۆمی.
١٠- لە ماوەی دانوستانەکاندا، ئەمریکا بەڵێنی داوە هێزەکانی لە ناوچەکە زیاد نەکات و هیچ سزایەکی نوێ بەسەر ئێراندا نەسەپێنێت.
١١- ئازادکردنی ٢٤ ملیار دۆلار لە داراییە بلۆککراوەکانی ئێران لە ماوەی ٦٠ ڕۆژی دانوستانە کۆتاییەکاندا، بە مەرجێک نیوەی ئەو پارەیە پێش دەستپێکردنی دانوستانەکان بۆ ئێران ئازاد بکرێت.
١٢- دامەزراندنی میکانیزمێکی چاودێری بۆ جێبەجێکردنی ڕێککەوتنەکە.
١٣- ڕێککەوتنی کۆتایی لە ڕێگەی بڕیارێکی ئەنجومەنی ئاسایشی نەتەوە یەکگرتووەکانەوە پەسەند دەکرێت.
١٤- دانوستانە کۆتاییەکان دەست پێ ناکەن پێش ئەوەی نیوەی داراییە بلۆککراوەکانی ئێران ئازاد بکرێن، سزاکانی سەر نەوتی ئێران ڕابگیرێن، و گەمارۆی دەریایی هەڵبگیرێت. ڕێککەوتنی کۆتایی سنووردار دەبێت بە چارەنووسی ماددە پیتێنراوەکان و پیتاندن، هەڵگرتنی سزاکان، و پلانی ئاوەدانکردنەوەی ئابووری ئێران، لەگەڵ دوورخستنەوەی هەمیشەیی پرسی بەرنامەی موشەکی ئێران و پشتیوانی لە گرووپەکانی "بەرخۆدان" لە خشتەی کارەکان.