ئێران هۆشداری توند بە ئەمریکا دەدات

موحسین ڕەزایی، فەرماندەی پێشووی سوپای پاسدارانی ئێران، ڕایگەیاند کە هەر ڕێککەوتنێکی چاوەڕوانکراو لە نێوان تاران و واشنتۆن، بەندە بە ڕەزامەندیی ئیدارەی دۆناڵد ترەمپ بۆ ئازادکردنی 24 ملیار دۆلار لە سەروەت و سامانە سڕکراوەکانی ئێران.
ڕەزایی لە چاوپێکەوتنێکدا لەگەڵ تۆڕی هەواڵی سی ئێن ئێنی ئەمریکی ئاماژەی بەوە کرد، پێویستە ترەمپ بە سەربەخۆیی و دوور لە کاریگەرییەکانی ئیسرائیل بڕیار بدات، هەروەها مافی گەلی ئێران بدات و کۆتایی بە گەمارۆکان بهێنێت. جەختی لەوەش کردەوە کە ئازادکردنی پارە سڕکراوەکان، دەتوانێت ئاسۆیێکی نوێ بۆ داهاتووی پەیوەندییەکانی نێوان ئێران و ئەمریکا بکاتەوە.
لە بەشێکی تری لێدوانەکانیدا، فەرماندەی پێشووی سوپای پاسداران داوای لە سەرۆکی ئەمریکا کرد بەرژەوەندییە کەسییەکان وەلا بنێت و بیر لە بەرژەوەندییەکانی گەلی ئەمریکا بکاتەوە. ئاماژەی بەوەش کرد کە دانوستانەکان گەیشتوونەتە بنبەست و دەبێت ترەمپ ئەو بنبەستە بشکێنێت، چونکە ئێستا تۆپەکە لە گۆڕەپانی ئەودایە.
 سەبارەت بە دەنگۆی ئەنجامدانی کۆبوونەوەیەکی چاوەڕوانکراو لە نێوان موجتەبا خامنەیی و دۆناڵد ترەمپ، ڕەزایی ئەو ئەگەرەی بەتەواوی ڕەتکردەوە و ڕایگەیاند کە شتێکی لەو شێوەیە ڕوونادات، چونکە هێشتا لە قۆناغی یەکەمی دانوستانەکانن و ئەوە ترەمپە پرۆسەکەی گەیاندووەتە بنبەست.
سەبارەت بە ئەگەرەکانی ڕووبەڕووبوونەوەی سەربازی، موحسین ڕەزایی هۆشدارییەکی توندی دا و ڕایگەیاند ئەگەر دانوستانەکان شکستیان هێنا و جەنگ بەردەوام بوو، یانیش گەمارۆی دەریایی هەڵنەگیرا، ئەوا شەڕەکە بۆ زەریای هیندی، گەرووی بابولمەندەب، دەریای سوور و دەریای ناوەڕاست دەگوازنەوە و بە ئامانجگرتنی بنکە ئەمریکییەکانی دیکە ڕەهەندێکی نوێ بە جەنگەکە دەدەن.
 لە کۆتاییدا جەختی لەوە کردەوە کە ئێران بۆ هەر هێرشێکی چاوەڕوانکراوی ئەمریکا بۆ سەر خاکەکەی ئامادەیە و لەو کاتەدا جیهان توانای ڕاستەقینەی ئێران دەبینێت، چونکە هێزی زەمینیی وڵاتەکەیان چەندین هێندەی توانای مووشەکییان گەورەترە.