عێراقچی ڕۆژی کوشتی ڕابەر لەوێ بووم

عەباس عراقچی، وەزیری دەرەوەی ئێران دەڵێت، ئەوساتەی عەلی خامنەیی كرایە ئامانج لە نوسینگەكەی بووم، هەموو هۆش و بیرم لای ئەوە بوو رابەر كراوەتە ئامانج یان نا.
عراقچی لە چاوپێكەوتنێكدا لەگەڵ كەناڵی "المیادین" ئاماژەی بەوەكرد، لەبیرتانە رۆژی پێنج شەممە دانوستان هەبوو لە ژنێڤ، رۆژی شەممە گەڕامەوە بۆ تاران و رۆژی شەممە رووداوەكە روویدا.
عراقچی لە درێژەی قسەكانیدا لەبارەی رووداوەكە باس لەوەدەكات، رۆژی شەممە كاتژمێر نۆی سەرلەبەیانی چووم بۆ نوسینگەی رابەری باڵا، وادەی دیدارم هەبوو لەگەڵ یەكێك لە بەرپرسەكان لەوێ،‌ بۆ ئەوەی راپۆڕتێك پێشكەش بكەم لەبارەی كۆبونەوەكانی ژنێڤ و ئەوەی لەوێ روویدا ‌.
ئەو باڵەخانەیەی ئێمەی تیادابووین كرایە ئامانج، بەڵام ئەوبەشەی ئێمەی لێبووین سەلامەت بوو، بەشەكەی تری باڵەخانەكە وێرانكرا، لەكاتی تەقینەوەكەدا لەوێ‌ بووم، یەكەم شتێك بەخەیاڵمدا هات لەوكاتەدا دەبێت دۆخی رابەری باڵا چۆنبێت، ئومێدەواربووم لەوكاتەدا لە نوسینگەی نەبوبێت، بەڵام بەپێودانگی بەرێوەچوونی رێوشوێنی كارەكان هەستمكرد لەوێیە.
عراقچی راشیگەیاند، لەگەڵ ئەوەی ئەمریكییەكان لەوماوەیەدا هێزێكی زۆریان بڵاوەپێكردبوو، ئەگەر روودانی جەنگ بەهێزبوو، بەڵام ورەی بەرزی رابەری باڵا رێگەی پێنەدەدا بچێتە پەناگەكان و لە نوسینگەی بوو.
دوای ئەوەی لەژێر داروپەردوی باڵەخانەكە هاتمە دەرەوەو گەڕامەوە بۆ بارەگای وەزارەتی دەرەوە، بۆ ماوەی 40 رۆژ نەگەڕامەوە بۆ ماڵەوە، لە بارەگای وەزارەتی دەرەوەوە هەوڵماندا دەنگی گەلی ئێرانی ستەملێكراو بگەیەنینە گوێچەكەی هەموو جیهان.
دەشڵێت، رۆژی یەكەم و دووەم زۆر نیگەران بووم لەبارەی دۆخی رابەری باڵا، تا ئەوكاتەی هەواڵی كوژرانی پشتڕاستكرایەوە.
 بە دڵنیایی كۆماری ئیسلامی لەوە بەهێزترە لەسەر كەسەكان راوەستابێت، دەستبەجێ دەستكرا بە هەڵبژاردنی سەركردایەتیەكی نوێ‌، خامنەیی لاو هەڵبژێردرا لەجێگگەی خامنەیی بە تەمەن.
بە دڵنیایی هەرگیز كاتی بۆردومانەكەم لەبیرناچێتەوە، زیاتر خەمی ژیانی رابەری باڵام بوو لە ژیانی خۆم، بەهەرحاڵ ئەو رووداوە بووە وەرچەرخان لە مێژووی ئێران، بووە خاڵێك كە هێزی ئێرانی بۆ هەمو جیهان دەرخست.