ئێران کشایەوە

ئێران کشایەوە، عێراق ڕاستەوخۆ سەردەکەوێت بۆ مۆندیالی 2026. 
​وەزیری وەرزشی ئێران بە فەرمی ڕایگەیاند کە وڵاتەکەی لە یارییەکانی مۆندیالی ئەمساڵ دەکشێتەوە و بەشداریی ئەو تورنۆمێنتە ناکات کە بڕیارە لە ویلایەتە یەکگرتووەکانی ئەمریکا بەڕێوەبچێت.
​ئەمڕۆ چوارشەممە 11ـی 3ـی 2026، ئەحمەد دونیا مالی، وەزیری وەرزشی ئێران لە چاوپێکەوتنێکی تەلەفزیۆنیدا ڕایگەیاند، بەهۆی بارودۆخی جەنگ و کوژرانی ڕێبەری باڵای وڵاتەکەیان لەلایەن ئەمریکا و ئیسرائیلەوە، هیچ مەرج و زەمینەیەک نییە کە ڕێگە بدات هەڵبژاردەی ئێران لەم کێبڕکێیانەدا ئامادە بێت.
​وەزیری وەرزش ئاماژەی بەوە کردووە: "لەو کاتەوەی ئەو حکومەتە گەندەڵە (ئەمریکا) ڕێبەرەکەمانی تیرۆر کردووە، ئێمە هیچ بارودۆخێکمان نییە کە تێیدا بتوانین بەشداری مۆندیال بکەین."
هەروەها جەختی کردەوە کە لە ماوەی هەشت نۆ مانگی ڕابردوودا دوو جەنگیان بەسەردا سەپێنراوە و هەزاران کەس لە خەڵکی ئێران کوژراون، بۆیە بە هیچ شێوەیەک ئەگەری بەشداریکردنیان نەماوە.
​ئەم بڕیارەی تاران دوای ئەوە دێت کە لە کۆتایی مانگی ڕابردوو، هێزەکانی ئەمریکا و ئیسرائیل زنجیرەیەک هێرشی بەرفراوانیان کردە سەر ئێران و تێیدا ئایەتوڵڵا خامنەیی، ڕێبەری باڵای ئەو وڵاتە کوژرا. لەو کاتەوە ململانێکان پەرەیان سەندووە و ئێران بە هێرشکردنە سەر بنکەکانی ئەمریکا لە وڵاتانی دراوسێی وەک بەحرەین، ئیمارات، عومان، سعودیە، ئوردن، قەتەر و کووەیت وەڵامی داوەتەوە.
​کشانەوەی ئێران لە مۆندیال لە کاتێکدایە کە تەنیا سێ مانگ بۆ دەستپێکردنی یارییەکان ماوە، ئەمەش قەیرانێکی گەورە بۆ فیدراسیۆنی نێودەوڵەتی تۆپی پێ (فیفا) دروست دەکات کە وڵاتێکی سەرکەوتوو بەهۆی جەنگەوە لەگەڵ وڵاتی خانەخوێ (ئەمریکا) بڕیاری کشانەوە دەدات.