ئینتەرنێت بە تەواوی ڕاگیرا

بە فەرمانی فەرماندەیی فەزای ئەلیکترۆنیی ئێران، خزمەتگوزاری ئینتەرنێت بە تەواوی ڕاگیراوە، تەنانەت ماڵپەڕەکانی حکوومەتی ئێرانیش لە ئینتەرنێت دابڕاون. هەموو ئەپڵیکەیشن، ماڵپەڕ یان خزمەتگوزارییەک لە ئێراندا هەیە، لە ئێستادا کار ناکات، به‌پێی ڕاگه‌یاندراوێك: "ئامانج لێی پچڕاندنی پەیوەندییە لە نێوان هاندەرانی ئاژاوە و ئەو لایەنانەی لە دەرەوە پاڵپشتییان دەکەن".
هاوكات هه‌ر به‌پێی ڕاگه‌یاندراوه‌كه‌، هێڵەکانی تەلەفۆنیش وەکو بەشێک لە ڕێکارەکان ڕاگیران.
پێشتر موحسین حاجی میرزایی، بەڕێوەبەری نووسینگەی مەسعود پزیشکیان،  سەرکۆماری ئێران، ڕایگەیاندبوو کە خزمەتگوزاری "ئینتەرنێتی سپی" بۆ هەمووان ڕاده‌گیرێت، تەنانەت بۆ ئەندامانی حکوومەتیش.
لە وەڵامی پرسیارێکدا سەبارەت بەوەی کە ئایا دەکرێت بابەتی لابردنی فیلتەر لە ئەنجوومەنی باڵای ئاسایشی نەتەوەیی بخرێتەڕوو، ڕوونی کردەوە: "ئەم بابەتە پەیوەندی بە ئەنجوومەنی باڵای ئاسایشی نەتەوەییەوە نییە. مەسەلەکە پەیوەندی بە بڕیاری ئەنجوومەنی باڵای سیبەرنییەوە هەیە."