بە پێی رێککەوتنی نێوان ئیسرائیل و حکوومەتی کاتیی سووریا کە بە ناوبژیوانیی ئەمریکا هاتە ئاراوە، سەرجەم هێزەکانی سەر بە حکوومەتی سووریا لە سوەیدا دەکشێنەوە و دۆسیەی سوەیدا ڕادەستی ئەمریکا دەکرێت.
ڕۆژی هەینی 25ی تەمووزی 2025، حکوومەتی کاتیی سووریا و ئیسرائیل سەبارەت بە ناوچەی سوەیدا لە باشووری ڕۆژئاوای سووریا لەسەر حەوت خاڵ ڕێک کەوتن. بە پێی بڕگەی یەکەمی ئەم ڕێککەوتنە دۆسیەی سوەیدا ڕادەستی ئەمریکا کراوە و هێزەکانی ئەمریکا سەرپەرشتیی مسۆگەرکردنی جێبەجێکرانی ڕێککەوتننامەکە دەکەن.
لە رێککەوتنەکەدا هاتووە: "پێویستە هۆزە عەرەبەکان و هێزە ئەمنییەکانی حکوومەت لە سوەیدا بکشێنەوە" و "گرووپی تایبەت هەموو گوندەکان دەپشکنن بۆ ئەوەی دڵنیا بنەوە هێزەکانی حکوومەت و هۆزەکان، ناوچەکەیان چۆڵ کردووە".
هەر بە پێی ڕێککەوتنەکەی نێوان سووریا و ئیسرائیل " ئەنجومەنە خۆجێیەکان کە لەلایەن خەڵکی خۆجێیی سوەیداوە پێک دەهێنرێن، خزمەتگوزارییە گشتییەکان بەڕێوە دەبەن" و " لیژنەیەکی چاودێری پێشهاتەکان تۆمار دەکات و ڕاپۆرت بۆ لایەنی ئەمریکی بەرز دەکاتەوە".
جەختیش کراوەتەوە "لە ناوچەکانی قونەیتەرە و دەرعا، لێژنەی ئەمنیی خۆجێی، چەکەکان کۆ دەکەنەوە بە شێوەیەک کە هیچ چەکێکی قورس لە ناوچەکە نەمێنێت".
لە خاڵی کۆتایی ڕێککەوتنەکەشدا ئاماژەوە بەوە کراوە: "چوونەژوورەوەی دامەزراوەکانی حکومەتی سووریا بۆ ناو سوەیدا قەدەغەیە و تەنها ڕێگە بە ئاژانسەکانی نەتەوە یەکگرتووەکان دەدرێت بچنە ئەم ناوچەیە".
وەڵام بدەوه