ئەگەر ئێران ڕازی نەبێت باجێکی قورس دەدات

بەپێی هەواڵێكی رۆژنامەی نیویۆرک تایمزی ئەمەریکی، گەورە بەرپرسانی باڵای ئێران فشاریان لە عەلی خامنەیی، رێبەری باڵای کۆماری ئیسلامی ئێران کردووە کە لە هەڵوێسەتەکانی پێشووی پاشگەزبێتەوە لەپێناو بەدوورگرتنی تاران لە رووبەڕووبوونەوەی راسەوخۆ لەگەڵ ئەمەریکادا.

بەپێی زانیارییەکانی رۆژنامەکە، مانگی رابردوو، مەسعود پزشکیان، سەرۆککۆماری ئێران، محەمەد باقر قالیباف، سەرۆکی پەرلەمانی ئێران و غولامحوسێن موحسینی، سەرۆکی دادگای باڵای ئێران لەگەڵ رێبەری باڵا سەبارەت بە وەڵامی نامەکەی دۆناڵد ترەمپ، سەرۆکی ئەمەریکا کۆبوونەوەتەوە کە لە نامەکەی سەرۆکی ئەمەریکادا هاتووە کە واشنتن داوای دانوستانی کردووە لەسەر پرسی بەرنامەی ئەتـ.ـۆمی ئێران، ئەگەر تاران رازی نەبێت بە مەرجەکانی ئەمەریکا ئەوا باجێکی قورس دەدات.

پێشتر عەلی خامنەیی چەندینجار رەتیکردووەتەوە دانوستان لەگەڵ ئەمەریکادا بکات و بە کارێکی گەمژانەی زانیوە، بەڵام وەک لە هەواڵەکەی نیویۆرک تایمزدا هاتووە، بەرپرسانی ئێران داوایان کردووە وڵاتەکەیان دانوستانی راستەوخۆ لەگەڵ ئەمەریکادا بکات، ئەگەر تاران دانوستان رەتبکاتەوە، ئەوا حکومەتی تاران دەڕوخێت.