وەزارەتی نەوتی حكوومەتی كاتیی سووریا ڕای گەیاند، بەپێی گرێبەستێكی نێوان هەردوولا، غاز لە ناوچەكانی ئیدارەی خۆبەڕێوەبەری سووریاوە هاوردە دەكەن.
ئەحمەد سلێمان بەڕێوەبەری پێوەندییە گشتییەكان و ڕاگەیاندن لە وەزارەتی نەوتی حكوومەتی كاتیی سووریا، بە ئاژانسی نۆرس پرێسی راگەیاند، گرێبەستی هاوردەكردنی گازی سروشتی لە ناوچەكانی ئیدارەی خۆسەرەوە، پێش ئازادكردنی سووریا كاری پێ كراوە و ئێستەش كاری پێ دەكرێت.
گوتیشی: "دوای ئەوەی چووینە ناو وەزارەتی نەوت، گرێبەستەكان بەتەواوی لێكۆڵینەوەیان لەسەر كرا، لە ناویاندا گرێبەستی دابینكردنی غاز لە ناوچەی ڕۆژهەڵاتی فوراتەوە، گرێبەستەكە خرایە بەردەم لیژنەیەكی یاسایی و هەندێك بڕگە هەموار كرایەوە، لە كاتێكدا كاركردن لەسەری بەردەوام بوو بۆ دابینكردنی پێداویستییەكانی غازی ناوچەكانی سووریا".
ئەو بەرپرسەی پێوەندییەكانی وەزارەتی نەوت ئاماژەی بەو دا، هیچ گرێبەستێك وەك ڕێككەوتنێكی نوێ واژوو نەكراوە، بەڵكو پێشتر بوونی هەبووە و دوای ئەوەی لەلایەن لیژنەی یاساییەوە هەموار كرایەوە، كاری لەسەر كراوە.
بەپێی خەمڵاندنەكان، زۆربەی كێڵگە نەوتی و غازییەكانی سووریا دەكەونە ناوچەكانی رۆژئاوای كوردستان و سنوورەكانی نێوان سووریا لەگەڵ توركیا و عێراق.
بەگوێرەی دوایین ئامارەكان داهاتی نەوتی سووریا ساڵانە لە دەوروبەری دوو ملیار و 500 ملیۆن دۆلاردایە، زۆرترین داهاتیش لەسەر كێڵگە نەوتییەكانی دێرەزوور و حەسەكە كۆدەكرێتەوە.
دێرەزوور: خاوەنی گەورەترین كێڵگەی بەرهەمهێنانی نەوتی سوریایە كە كێڵگەی عومەرە، ئەو كێڵگەیە 15 كیلۆمەتر لە رۆژهەڵاتی شارۆچكەی بەسیرە دوورە، لە 22ی تشرینی یەكەمی ساڵی 2017ەوە لە دەستی هەسەدەدایە.
لەدوای كیڵگەی عومەر، كێڵگەی تنك دووەم گەورەترین كێڵگەیە لە سووریا، كەوتووەتە بیابانی شەعیتار لە پارێزگای دێرەزوور، لەژێر كۆنتڕۆڵی هەسەدەدایە.
جگە لەو دوو كێڵگە گەورەیەی نەوت، چەند كێڵگەیەكی نەوتی بچوكتر كەوتوونەتە سنووری ئەو پارێزگایە لەوانە: كێڵگەكانی وەرد، تەیم، جفرە، كونیكو. هەروەها بۆرییەكی نەوت بەناوی (تی 2) كەوتووەتە سەر رێگەی عێراق و سووریا.
ڕەقە: لە سنووری پارێزگای ڕەقەدا چەند كێڵگەیەكی نەوتی بچووك هەیە كە ئەوانیش لە ژێر دەستی شەڕڤاناندان.
حەسەكە: لە سنووری حەسەكە، كێڵگەی رمێلان هەیە كە دەكەوێتە باكووری رۆژهەڵاتی سووریا و لە ژێر دەستی شەڕڤاناندایە، كێڵگەی رمێلان هەزار و 322 بیرە نەوتی تێدایە.
جگە لەوەش چەند كێڵگەیەك لە ناوچەكانی شەدادی و جەبسە و هۆل هەیە، لە نزیك ناوچەكانی مەركەدە و تشرینی كەبیبە كە دەكەونە باشووری حەسەكەوە.
وەڵام بدەوه