وەزیری دەرەوەی ئەمەریکا گەیشتە ئیسرائیل 

مارکۆ رۆبیۆ وەزیری دەرەوەی ئەمەریکا یەکەم گەشتی خۆی بۆ رۆژهەڵاتی نێوەڕاست لەدوای دەستبەکاربوونی کابینەی نوێی ئەمەریکا دەستی پێکرد و شەوی رابردوو گەیشتە ئیسرائیل و بڕیارە لەگەڵ رێبەرانی ئەو وڵاتەدا کۆ ببێتەوە و پاشان سەردانی چەند وڵاتێکی تر بکات.

داهاتووی غەزە و پلانەکانی دۆناڵد ترەمپ سەرۆکی ئەمەریکا بۆ ئەو پرسە گرنگترین ئەو بابەتانەیە کە وەزیری دەرەوەی ئەمەریکا لەگەڵ ئیسرائیلییەکان دەیخاتە روو.

رۆبیۆ رای گەیاندووە پلانەکەی ترەمپ لەبارەی غەزە تاکە پلانە کە بۆ ئێستە و ئایندەی غەزە لە ئارادایە و هەرچەندە واشنتن پێشوازی لە پێشنیاری نوێی وڵاتانی عەرەبی بۆ داهاتووی غەزە دەکات.

یەکێک لەو شتانەی کە وەزیری دەرەوەی ئەمەریکا پێداگری لەسەر کردووە و بە جۆرێک هێڵی سووری داناوە ئەوەیە هەر پلانێک ببێتە هۆی ئەوەی حەماس لە غەزە بمێنێتەوە ئەوا لە لایەن ئیسرائیل رەت کراوەتەوە.

بەگوێرەی ''عەرەبیە'' وەزیری دەرەوەی ئەمەریکا پێی وایە هەر پلانێک شایانی جێبەجێکردن و قبوڵکردنە بە مەرجێک لە پلانەکەی دۆناڵد ترەمپ لەبارەی ئایندەی غەزە باشتر بێت.

چاوەڕوان دەکرێ رۆبیۆ سەردانی سعوودیە و چەند وڵاتێکی تری عەرەبی بکات و پێشنیار و پلانەکانیان لەبارەی غەزە وەربگرێت.

بەپێی ئەو پلانەی ترەمپ بۆ خەڵکی غەزە دایناوە، دانیشتووانەکەی بۆ میسر و ئوردن و چەند وڵاتێکی تر بگوازرێنەوە و کەرتەکە لە ژێر سەرپەرشتی ئەمەریکا و بە یارمەتی وڵاتانی عەرەبی ئاوەدان بکرێتەوە و لە شوێنێکی جەنگ و وێرانەوە بۆ شوێنی وەبەرهێنان و ژیانی ئارام بگۆڕدرێت.