هۆشداری ئیسرائیل دەربارەی دۆخی سوریا و کورد لە ڕۆژ ئاوای کوردستان ڕایگەیاندرا

ئەمڕۆ یەكشەممە، 1ی 12ی 2024، جەدعۆن ساعر، وەزیری دەرەوەی ئیسرائیل، ڕایگەیاند: هیچ لایەنێك لە ململانێی پەرەسەندووی سووریادا بەلای ئیسرائیلەوە پەسند و باش نییە.
لەمیانی كۆنگرەیەكی ئەمنیدا، وەزیری دەرەوەی ئیسرائیل گوتیشی: لە ململانێی سووریادا، ڕژێمێك لەلایەكەوە پشتیوانی لە "جیهادییەكان" كە بریتین لە بەرەی جیهادییەكانی شیعە و ئێران و حزبوڵا دەكات، لەلایەكی دیكەوە جیهادییە سونییەكان هەن و ئەم دوو بەرەیە ئێستا دژ بە یەکتر لە ململانێدان.
دەشڵێت: "ناكرێ لایەنگریی هیچ لایەك لەو شەڕەدا بكرێت، چونكە هیچ یەكێك لەو بەرەیە پەسند نین. پێشنیاز دەكەم بە ڕوانینێكی فراوانتر سەیری ناوچەكە بكەین، چونكە گەر لە ڕووی سەربازییشەوە چالاك نەبین، پێویستە لە چۆنیەتیی پێكهاتنی ناوچەكە بەئاگا بین."
گوتیشی: "بارودۆخێكی ئەوتۆ نابینین بۆ ئەوەی سووریا بگەڕێتەوە دۆخێك، بە شێوەیەکی مەرکەزی سەروەریی خۆی لە هەموو خاكەكەیدا پەیڕەو بكات، وەكوو ئەوەی لە ڕابردوودا هەیبووە.
ساعر ئەوەشی گوت: "پێم وایە ئەوەی زیاتر واقیعییە و لە بەرژەوەندیی ئیسرائیلیشە، دواڕۆژی دەوڵەتی سووریایە وەكوو دەوڵەتێكی فیدراڵی، كە تێیدا پێكهاتەكانی وەكوو كورد و دورزییەكان، خۆ بەڕێوە ببەن."
شایەنی باسە لە چەند مانگی ڕابردوودا، هێزی ئاسمانیی ئیسرائیل، هێرشە ئاسمانییەكانی بۆ سەر سووریا، لە دژی گرووپە چەکدارییەکانی سەر بە ئێران خەست كردووتەوە