پێنجەم تۆماری دەنگی دزەپێكراو كە دەگوترێت دەنگی نوری مالیكییە بڵاوكرایەوە

پێنجەم تۆماری دەنگی دزەپێكراو كە دەگوترێت دەنگی سەرۆكی هاوپەیمانی دەوڵەتی یاسا، نوری مالیكی-یە بڵاوكرایەوە كە تیایدا رایگەیاندووە ،گرووپەكانی فەتح، حزبوڵڵا، عەسائیبی ئەهلی حەق و سەیدولشوهەدا بڕیارەكانیان بەدەست ئێرانە.
لە ماوەكانی رابردوودا، كەسێك بەناو عەلی فازڵ لە هەژماری تایبەتی خۆی لە تۆڕی كۆمەڵایەتیی تویتەر چوار تۆمار دەنگی دزەپێكراو كە گوایە دەنگی نوری مالكی-یە بڵاوكردەوە.
شەوی رابردوویش ئەو كەسە، پێنجەم تۆماری دەنگی بڵاوكردەوە كە گوایە دەنگی دزەپێكراوی نوری مالیكی-یە.
لەو تۆمارە دەنگییەدا، كە گوایە مالیكی-یە هاتووە "پەیوەندییم لەگەڵ قەیس خەزعەلی، ئەمینداری گشتیی عەسائیبی ئەهلی حەق و ئەبو ئالا وەلائی، ئەمینداری گشتیی كەتائیبی سەیدولشوهەدا باشە، بەڵام برادەرانی بەدر و فەتح بێكارن و گوێ بە رەوشەكە نادەن و بەكاری باخەوە خۆیان سەرقاڵ كردووە.
لە بەشێكی دیكەی ئەو تۆمارە دەنگییە دزەپێكراوەدا، هاتووە ، گرووپەكانی فەتح، حزبوڵڵا و عەسائیبی ئەهلی حەق و سەیدولشوهەدا بڕیارەكانیان بەدەست ئێرانە.
لە ناوەڕۆكی پێنجەم تۆمارە دەنگییەكەدا باس لە ململانێیەكان لە ئێران دەكرێت و ئەو كەسەی كە دەگوترێت نوری مالیكی-یە رایگەیاندووە ، لەدوای ئەوەی ئیبراهیم رەئیسی بووەتە سەركۆماری ئێران، كێشە لەنێوان سوپای پاسداران و حكوومەت دروست بووە كە یەكەمیان هێڵی رێبەری باڵای ئێران عەلی خامنەیی، رێبەری باڵای شۆڕشی ئیسلامیی ئێران و سوپای پاسداران و دووەمیان، هیڵی ئیتڵاعات و سەركۆماری ئەو وڵاتەیە.
لە تۆمارە دەنگییەكەدا هاتووە ،سوپای پاسداران رێگا بە ئیتڵاعات نادات دەست لە هیچ رووداوێك وەربدات و ئەو پرسانەی سوپای پاسداران دەستی بۆ دەبات كەسی دیكە ناتوانێت بەو شێوەیە بكات، من چووم بۆ ئێران و گفتوگۆم لەگەڵ زۆر لە بەرپرسانی ئەو وڵاتە ئەنجامداوە و لەدوای هەموو گفتوگۆیەك دەڵێن پرسەكە بەدەست فەیلەقی قودسی سەربە سوپای پاسدارانە و ئێوە هەوڵەكانتان با لەگەڵ سوپای پاسداران بێت.
لە 13ی تەمووزی 2022وە تا ئێستا، پێنجەم تۆماری دەنگیی دزەپێكراوە كە دەگوترێت دەنگی نوری مالیكی-یە بڵاوكراونەتەوە، بەڵام نوری مالیكی و حزبی دەعوە رەتیدەكەنەوە كە ئەو تۆمارە دەنگییانە، دەنگی ئەو بێت و رایگەیاندووە كە ئەو تۆمارە دەنگییانە، ساختە و دروستكراون.
ئەو تۆمارە دەنگییانە كاردانەوەی توندی ژمارەیەك لە سەركردە عێراقییەكانی لێكەوتووەتەوە، بەتایبەتی سەركردەی رەوتی سەدر، موقتەدا سەدر كە لە بەشێكی ئەو تۆمارە دەنگییانەدا هێرشی توند كراوەتە سەری و بە كەسێكی ترسنۆك ناوی هێندراوە.
دوێنێ 18ی تەمووزی 2022موقتەدا سەدر بەتوندی وەڵامی ئەو تۆمارە دەنگییەی كە دزەی پێكراوە كە دەگوترێت مالیكی-یە دایەوە و رایگەیاند" "لە لایەن حزبی دەعوە و گەورەكەیان كە مالیكی-یە، هەڕەشەی كوشتنم لێكراوە