دوای سێ مانگ لە تێكشكانی هەلیكۆپتەری ئیبراهیم رەئیسی، سەرۆكی پێشووی ئێران لە باكوری رۆژئاوای ئەو وڵاتە، سەرچاوەیەك بە ئاژانسی "فارس"ی نیوچە فەرمیی ئێرانی راگەیاند كە هۆكاری رووداوەكە دۆخی كەشوهەوا و باری قورسی فڕۆكەكە بووە، وای كردووە خۆی بە لووتكەی چیایەك بكێشێت.
بەپێی سەرچاوەكە كە ئەمڕۆ چوارشەم بۆ ئەو ئاژانسە نیوچە فەرمییەی ئێران قسەی كردووە، رووداوی تێكشكانی هەلیكۆپتەری سەرۆكی پێشووی ئێران لە 19ی ئایاری رابردوو لە ناوچەیەكی چیایی لە پارێزگای ئازەربایجان لە باكوری رۆژئاوای ئێران و كوژرانی خۆی و وەزیری دەرەوە و ژمارەیەك بەرپرسی تر، بەهۆی نالەباری كەشوهەوا و بێتوانایی هەلیكۆپتەرەكە بووە بۆ هەڵگرتنی بارە قورسەكەی، ئەوەش بەپێی ئەنجامی كۆتایی لێكۆڵینەوەكانە لە رووداوەكە.
سەرچاوەكە روونی كردەوە كە ژمارەی سەرنشینانی هەلیكۆپتەرەكە لە ژمارەی ئاسایی زیاتر بووە، بۆیە نەیتوانیوە بۆ بەرزایی پێویست هەڵبفڕێت و لەناو كەشوهەوایەكی تەمومژاویدا خۆی بە لووتكەیەك لە ناوچەكە كێشاوە.
ئەوە لەوكاتەی لە لێكۆڵینەوەیەكی پێشوو باسی ئەوە كرا فڕۆكەكە دووچاری تەقینەوەیەكی بەمەبەست نەبووە یان هیچ شوێنەواری شەڕی ئەلیكترۆنی بەسەردا دیار نەبووە، بەڵام ئەوكات باسی ئەوە كرا كە باری فڕۆكەكە ئاسایی بووە و ژمارەی سەرنشین و كەرەستەكانی باری كردوون ئاسایی بوونە، راپۆرتی دووەم كە لەلایەن لیژنەیەكی باڵای لێكۆڵینەوە كراوە، باسی ئەوە دەكات كە لە پشكنینی پارچە تێكشكاوەكانی فڕۆكەكە دیارە تەقینەوە رووی نەداوە و هیچ كێشەیەكی تەكنیكی نەبووە.
وەڵام بدەوه