رووداوێکی سەختی ھاتوچۆ لە زاخۆ بووە

رووداوێکی گەورە و سەختی هاتووچۆ لەنزیک تونێلی زاخۆ روویدا، گوتەبێژی تەندروستیی زاخۆ رایگەیاند، بەهۆی رووداوەکە تائێستا کەسێک گیانی لەدەستداوە و 29 برینداریش تۆمارکراون.

رۆژی پێنجشەممە 13-07-2023 ئەمیر عەلی، گوتەبێژی تەندروستیی زاخۆ بە راگەیاند "لە رێگەی گرشین لە نزیک تونێلی زاخۆ رووداوێکی گەورەی هاتووچۆ روویداوە، بەهۆیەوە کەسێک گیانی لەدەستداوە و زیاتر لە 29 کەس بریندار بوون."

بە گوتەی ئەمیر عەلی، ئەو 29 کەسەی بریندار بوون، نۆ کەسیان ئافرەتن و 20ـەکەی دیکەیان پیاون، ئەو کەسەش کە گیانی لەدەستداوە پیاوە و تەمەنی 30 ساڵە، "رووداوەکە لەنێوان بارهەڵگرێک و ئۆتۆمبێلێکی تایبەت روویداوە."

بەشیر یوسف، بەرپرسی راگەیاندنی ھاتووچۆی زاخۆ رایگەیاند، رووداوەکە کاژێر 10:30 خوولەکی بەیانیی ئەمڕۆ لەنێوان بارهەڵگرێکی جۆری "کیا دووتەنی" و "مێرسیدسێک" بووە، جگە لە گیانلەدەستدانی کەسێک و برینداربوونی 29 کەسی دیکەش، زیانێکی مادیی زۆر بە هەردوو ئۆتۆمبێلەکە کەوتووە.