وەزارەتی ئاوەدانکردنەوە و نیشتەجێکردن ڕایگەیاند، لە ئاییندەیەکی نزیکدا قۆناغێکی گرنگی پڕۆژەی هێڵی ئاسن تەواو دەکرێت.
ئەمڕۆ سێشەممە 13ـی 06ـی 2023 دانا عەبدولکەریم، وەزیری ئاوەدانکردنەوە و نیشتەجێکردن لە دیوانی وەزارەت پێشوازی لە پیدرۆ مارتینیز باڵیۆزی ئیسپانیا لە عێراق و خولیان گارسیا ڤاڵڤێرد، خاوەنی کۆمپانیای (کۆنسوڵ ترانس)ـی ئیسپانی کرد، وەزارەتی ئاوەدانکردنەوە و نیشتەجێکردن لەبارەی دیدارەکە ڕایگەیاند: گفتوگۆ کرا سەبارەت بە پەرەپێدانی پەیوەندییەکانی نێوان هەردوولا و هەماهەنگی زیاتر و بەشداری کۆمپانیا ئیسپانییەکان لە سێکتەرە جیاوازەکان و ئاوەدانکردنەوەی هەرێمی کوردستان.
ڕاشیگەیاند: پڕۆژەی هێڵی ئاسن لە هەرێمی کوردستان، تەوەرێکی دیکەی دیدارەکە بوو، ئەم پڕۆژەیە ئێستا لە قۆناغی کەڵکی ئابووریدایە (feasibility study) و لەلایەن کۆمپانیای (کۆنسوڵ ترانس)ـی ئیسپانییەوە جێبەجێ دەکرێت، لەمڕووەوە خاوەنی کۆمپانیاکە دڵنیایی دا بە وەزیری ئاوەدانکردنەوە و نیشتەجێکردن کە لە ئاییندەیەکی نزیکدا کارەکانی قۆناغی کەڵکی ئابووری تەواو دەکەن و ڕاپۆرتی کۆتایی پێشکەشی وەزارەتی ئاوەدانکردنەوە و نیشتەجێکردنی دەکەن، کە ئەوەش قۆناغێکی گرنگی پڕۆژەکەیە.
وەزارەتی ئاوەدانکردنەوە و نیشتەجێکردن ئاماژەی بەوەش دا کە هەردوولا هاوڕابوون لەسەر ئەوەی جێبەجێکردنی ئەم پڕۆژەیە سەرەتا و هەنگاوێکی گرنگ دەبێت بۆ ئەوەی لە داهاتوو کاری هاوبەش و پڕۆژەی گەورەتر بۆ خزمەتکردنی هاووڵاتییان و ئاوەدانکردنەوەی زیاتری هەرێمی کوردستان ئەنجام بدەن.
وەڵام بدەوه