مووچەی ھەزاران کەس دابەشدەکرێت

نوێنەری گشتیی مامۆستایانی وانەبێژ ڕایدەگەیەنێت، پارەی مانگی چواری وانەبێژان دابەش دەكرێت و لەم هەفتەیەدا لە چەندین پەروەردە دابەش دەكرێت.

دوێنێ لە پەروەردەی مەخموور، شایستەی دارایی مانگی چواری مامۆستایانی وانەبێژ دابەش کرا، لەمبارەیەوە، کارۆخ عەبدوڵا، نوێنەری گشتیی مامۆستایانی وانەبێژ،  ڕاگەیاند: دەست بە دابەشكردنی مووچەی مانگی نیسانی مامۆستایانی وانەبێژ کراوە، لەم هەفتەیەدا لە چەندین پەروەردە دابەش دەكرێت.

نوێنەری گشتیی مامۆستایانی وانەبێژ ئاشکراشی کرد: هەموو چەكەكان ئامادەن و هەفتەی داهاتوو لە سەرجەم پەروەردەکان شایستەی دارایی مانگی چوار دابەش دەکرێت."

بەپێی ڕێنوێنیی ژمارە 14ی دارایی، ئەو مامۆستا وانەبێژانەی هەڵگری بڕوانامەی دبلۆمن، 350 هەزار دیناریان بۆ خەرج دەکرێت و بۆ هەڵگرانی بڕوانامەی بەکالۆریۆسیش 400 هەزار دینار خەرج دەکرێت.

ژمارەی مامۆستایانی وانەبێژ لە هەرێمی کوردستان 35 هەزار و 543، مامۆستای وانەبێژە، كە مووچەی مانگانەیان زیاتر لە 13 ملیار و 700 ملیۆن دینارە.