ئەنجومەنی ئاسایشی هەرێمی کوردستان لەبارەی کەوتنە خوارەوەی هێلیکۆپتەرەکان راگەیەندراوێکی بڵاوکردەوە

ئەنجوومەنی ئاسایشی هەرێمی کوردستان زانیاری زیاتر لەسەر کەوتنەخوارەوەی هێلیکۆپتەرێک لە شەوی 15/16 ـی ئاداری 2023 بڵاوکردەوە.

لە راگەیەندراوەکەی ئەنجوومەنی ئاسایشی هەرێمی کوردستان هاتووە، دژە تیرۆری کوردستان لە راگەیەندراوی سەرەتایی خۆیدا روونیکردەوە، کە یەک هێلیکۆپتەر کەوتووەتە خوارەوە و چەند کەسێکیش گیانیان لەدەستداوە، کە بەپێی بەڵگەنامەکان سەر بە پەکەکە بوون.

لە راگەیەندراوێکدا کە لە رێکەوتی 17ـی ئاداری 2023 بڵاوبووەتەوە، هەسەدە دانی بە کەوتنەخوارەوەی دوو هێلیکۆپتەر و گیانلەدەستدانی نۆ کەسدا ناوە کە سەر بە هێزەکانی سووریای دیموکراتن، بەڵام ئەنجوومەنی ئاسایش باس لەوە دەکات، ئەوان تا ئێستا تەنیا کەوتنەخوارەوەی یەک هێلیکۆپتەر و گیانلەدەستدانی حەوت کەس پشتراست دەکەنەوە.

ئەنجومەنی ئاسایشی هەرێم رایگەیاند، ئەو هێلیکۆپتەرانە لەنێوان رۆژئاوا و سلێمانی فڕیون بەبێ ئەوەی دەزگا فەرمییەکانی هەرێم ئاگاداربکەنەوە.

بە گوێرەی زانیارییەکانی ئەنجومەنی ئاسایشی هەرێم، ئەو هێلیکۆپتەرانە لە چەند بنکەیەکی پارێزگای سلێمانی دابەزیون و بەرەو رۆژئاوا فڕیون

ئاماژەیان بەوەشدا، لایەنێک لە سلێمانی بەشێوەیەکی نهێنی و نافەرمی رێگەخۆشکەر بووە بۆ پەیوەندییەکانی هێزەکانی هەسەدە و پەکەکە و بە چەندین جۆری جیاواز هاوکارییان کردوون.

ئەنجومەنی ئاسایشی هەرێمی کوردستان داوا لە هاوپەیمانان و حکومەتی فیدراڵ دەکەن، روونکردنەوە بدەن کە ئەم هێلیکۆپتەرانە بە کام مۆڵەت لەسەر خاکی هەرێمی کوردستان دەفڕن و کێ بەرپرسیارێتی ئەم کارە نایاساییانە هەڵدەگرێت