لە گوندێكی كوردانی سنوری قەزای داقووقی سەر بە پارێزگای كەركووك، هەوڵی داگیركردنی سەدان دۆنم زەویی كشتوكاَلی گوندەكە دەدرێ بۆ ئەوەی بكرێتە سەربازگە بۆ سوپای عێراق.
ئیحسان ساڵح، هاووڵاتییەكی خەڵكی گوندی كولی تەپەی سەر بە قەزای داقووقە، ئاشکرایکرد: "وەزارەتی بەرگریی عێراق نووسراوێكی ئاراستەی بەڕێوەبەرایەتیی كشتوكاڵی كەركووك كردووە بۆ ئەوەی 500 دۆنم زەویی كشتوكاڵی گوندی كولەی تەپەیان بۆ تەرخان بكرێت تاكوو سەربازگەی لەسەر دروست بكەن و ئەو زەویانە بكرێتە ناوی وەزارەتی بەرگری عێراقەوە."
گوتیشی: "ئەو زەویانەش هی دەیان جووتیاری گوندەكەمانە و هەوڵەكانیش چڕ كراون بۆ ئەوەی رێگریی بكرێت لەو هەوڵی داگیركارییە، بەڵام خەڵكی گوندەكە ترسیان لەوەیە هێزە سەربازییەكان بە زەبری هێز بێن و سەربازگە لەناو گوندەكە دروست بكەن و گوندەكە بە تەواوەتی داگیر بكەن.
بەپێی زانیارییەكان لیژنەیەك لە بەڕێوەبەرایەتیی كشتوكاڵی كەركووكەوە چوونەتە سەر زەوییەكانی ئەو گوندە، بەڵام ئەوە نەزاندراوە بە چی هۆكارێك چوونەتە سەر ئەو زەوییانە.
ئەمە لە كاتێكدایە مانگی ڕابردوو، هەوڵی داگیركردنی سەدان دۆنم زەویی خەڵكی گوندی تۆپزاوەی كوردانی نزیك كەركووك لەلایەن سوپای عێراقەوە درا بۆ ئەوەی خانووی لەسەر دروست بكەن و بیكەنە ناوچەیەكی نیشتەجێبوون بۆ سەرباز و ئەفسەرانی سوپای عێراق، بەڵام بە هەوڵی پەرلەمانتارانی پارتی ئەو هەوڵە ڕاگیرا.
وەڵام بدەوه