بەھارێکی تەر و باراناوی بەرێوەیە.

شارەزایەکی بواری کەشناسی ئاشکرایکرد کە شەپۆلێکی باران و هەورە بروسکە بەڕێوەیە و پلەکانی گەرما بە رێژەی پێنج تا شەش پلە نزمدەبنەوە.

ئەمشەو شەممە 4/3/2023، ئاراس جەبار، شارەزای بواری کەشناسی بڵاویکردەوە: "لە رۆژی دووشەمەوە 6/3/2023، ھەرێمی کوردستان و ناوچەکە دەکەوێتە ژێر کاریگەری نزمە پاڵەپەستۆیەک لەدەریای ناوەراستەوە ھاوکات بارستە ھەوایەکی شێدار و فێنکی لەگەڵدا دەبێت کە لە سەرەتای ھاتنی دەبێتە ھۆی ناجێگیربوونی کەشوھەوای ناوچەکە ھەر لە زیادبوونی خێرای با و خۆڵبارین و نزمبوونەوەی پلەکانی گەرما بەرێژەی 5 تا 6 پلەی سەدی، پاشان چالاکبوونی ھەورە بروسکە و تاوە باران لەکات و ناوچەی جیاجیادا".

ئەوەشی خستووەتە روو: "بەگوێرەی خوێندنەوەی نەخشە جیاوازەکان بە تێکرا لەناوچەکانی سنووری پارێزگای سلێمانی، ھەڵەبجە و گەرمیان کاریگەری ئەم شەپۆلە چالاکتر دەبێت ئەگەری گەشەسەندنی ھەورە بروسکەی بەھێز و تاوە تەرزە و بارانی بەخوڕی لێ دەکرێت و تاوەکوو رۆژی ھەینی 10/3/2023، بەردەوامی دەبێت بەشێوەیەک جار جار کەشەکە ئاسایی دەبێتەوە و پاشان تاو تاو باران و بروسکە دەستپێدەکاتەوە.

ئاماژەشی بەوەداوە: "لەسەرجەم ناوچەکان بارانی باش دەبارێت ھەرچەندە رێژە و بڕی باران تاوەکوو رادەیەک نادیارە بۆ تەواوی ناوچەکان بەھۆی ناسەقامگیری دۆخەکەوە تەنھا ئەوەندە روونە کە زۆرترین کاریگەری لەسەر ناوچەکانی پارێزگای سلێمانی، ھەڵەبجە و گەرمیانە".

ئەو شارەزایەی بواری کەشناسی راشیگەیاندووە: "دوای ئەم شەپۆلە ھەفتەکانی دواتر ئەگەری گەرانەوەی کەشی زستانە و سارد ھەیە لەگەڵ ھاتنی شەپۆلی مەودا فراوانی باراناوی بە ئاراستەی ناوچەکانمان".