شارەزایەکی بواری کەشناسی ئاشکرایکرد لە ئێوارەی سبەینێ چوارشەممەوە تا ئێوارەی پێنجشەممە لە زۆرینەی ناوچه کوێستانییەکان و شارۆچکەکانی نێوان چیاکان ئەگەری بەفربارینێکی کەم هەیە و پلەکانی گەرمی بۆ ژێر سفری سەدی دادەبەزن.
ئەمشەو سێشەممە 14/2/2023، سیروان ساڵح، شارەزای بواری کەشناسی بڵاویکردەوە: "لە ئێوارەی سبەینێ چوارشەممەوە تا ئێوارەی پێنجشەممە بەهۆی کاریگەری ناوچەیەکی پەستان نزمی لاوازی دەریای ناوەڕاست لە زۆرینەی ناوچه کوێستانییەکان و شارۆچکەکانی نێوان چیاکان ئەگەری بەفربارینی کەم هەیە له دەشتەکانی نێوان زنجیرە چیاکانیش ئەگەری بارانبارینی کەم هەیە".
ئەوەشی خستووەتە روو: "له کاتەکانی نیوەشەو بەدواوە ئەگەر هەیە بەفربارینی کەم سەنتەری شارەکانی سلێمانی و هەڵەبجە بگرێتەوە و پلەکانی گەرماش بۆ ژێر سفری سەدی دادەبەزن بەتایبەت لە کاتەکانی شەودا".
روونیشیکردووەتەوە کە ئەم بارودۆخە سەنتەری شارەکانی دهۆک و رۆژئاوای هەرێمی کوردستان ناگرێتەوه و لە ئێوارەی پێنجشەممەش کۆتایی بەو شەپۆلە لاوازە دێت.
هەروەها لەبارەی ناوچەکانی گەرمیانەوە رایگەیاندووە: ئاسمان لە نێوان هەتاو بۆ کەمێک هەوری دەبێت، لە هەندێ شوێنی جیاواز لە ئێوارەی سبەی یان شەوی چوارشەممە لەسەر پێنجشەممە ئەگەری بڕێکی کەم دڵۆپه باران هەیه بەزۆریش لە بەشێک ناوچەکانی باکووری گەرمیان و زۆربەی ناوچەکانی تری گەرمیان ناگرێتەوە.
جەختیشکردووەتەوە کە سبەی شەو چوارشەممە لەسەر پێنجشەممە ئەگەر هەیە بەفربارینی زۆر کەم سەرەوەی زنجیره چیاکانی بەمۆ، زمناکۆ، زەردە، سەگرمە و چیاکانی قەرەداغ بگرێتەوە و ڕۆژی پێنجشەممەش کۆتایی بەو شەپۆلە لاوازە دێت.
وەڵام بدەوه