كوردان د جاما كه‌نداڤ دا نیشتیمانێ خوه ونداكر!
هۆگر نێروه‌یی
چه‌ند رۆژه‌كه جاما كه‌نداڤ ل به‌سرایێ برێڤه‌دچیت، كو ئیراق مێڤانداریێ دكه‌ت، دوكێلا نیشتیمانبوونێ ل به‌سرایه لێ ئاگر ل باژارێن كوردستانێ یه! دگه‌ل تۆماركرنا هه‌ر گوله‌كێ ژ ئالیێ یاریزانێن عیراقێ ڤه ل باژارێن هه‌رێما كوردستانێ هاوارا خوه‌شیێ و شادیێ بلندبیت، ئاریشه ئه‌و نینه هاواربكه‌ن، لێ ئه‌ڤا كوردان هاوارا گول تۆماركرنێ نینه، به‌لكو هاوارا نیشتیمانبوونێ یه! كو كه‌ربوكینه‌كا مه‌زن بۆ نیشتیمانێ خوه بۆ هه‌ر گوله‌كێ هاواردكه‌ن عیراق نیشتیمانێ مه‌یه. مافێ ته‌یه ب گول تۆماركرنا ئیراقێ دلخوه‌ش بی، هه‌ڤده‌م ئیراقێ ب ده‌وله‌تا خوه‌ژی بزانی كو هێشتا كوردان چو ده‌وله‌ت نینن كو خه‌لكێ دی ئیراق ب زۆری كریه ده‌وله‌تا پشه‌كا كوردان، هه‌ڤده‌م و جیهانێ دا مرۆڤ بۆ ناسناما خوه ب ده‌وله‌تێ دهێته نیاسین نه ب چو تشتێن دی، لێ نیشتیمانێ كوردان بتنێ كوردستانه نه چو نیشتیمانێ خه‌لكێ دی، نیشتیمان ب ره‌چه‌له‌كی ڤه گرێدایه ل ده‌رڤه‌ی ڤێ نیشتیمانه‌كێ دی ب نیشتیمانێ خوه بزانی پشكنینا DNA زه‌روریه‌ته بۆته بهێته‌كرن.
لیۆنێل مێسی، ئه‌فسانه‌یێ ته‌پاپێی ده‌ما زارۆك بوو نه‌خۆشیه‌ك هه‌بوو، ژبه‌ر هه‌ژاریێ نه‌شیا چاره‌سه‌ریا خوه بكه‌ت، ئه‌رجه‌نتین كو نیشتیمانێ وی بوو لێ نه‌زڤری چاره‌سه‌ریا وی نه‌كر و لێ نه‌بوو خودان، بارشلۆنایا ئسپانی كو نیشتیمانه‌كێ دن بوو خوه لێ كره خودان و نه‌خۆشیا وی چاره‌سه‌ركر هه‌ڤده‌م ل نه‌داریێ و هه‌ژاریێ كره یاریزابه‌كێ دیار ل جیهانا ته‌پاپێ دا و ئێك ژ زه‌نگینترین یایزانێن جیهانێ، ل وی ده‌می ئسپانیا باشترین هه‌لبژارتیا جیهانێ بوو، چه‌ند جاران داخواز ژ مێسی كر كو یاریێ بۆ ئسپانیا بكه‌ت ل شوینا ئه‌رجنتین، لێ مێسی نیشتیمانێ خوه نه‌گوهۆری، نه‌گۆت ده‌ما زارۆك و نه‌دار نیتشیمانێ وی پشتا خوه دایێ چ بۆ نه‌كریه نیشتمانه‌كێ هه‌ر تشت بۆ كریه، بریارا وی ئه‌وبوو كو نیشتیمان ئه‌لته‌رناتیڤ نینه.
مێسی ده‌ما نازناڤێن گرنگ ل گه‌ل بارشلونا ل ده‌ستدان خه‌مگین دبوو، لێ چوجاران رۆندك بۆ به‌رشه‌لۆنا نه‌ئینانه خارێ، لێ بۆ ئه‌رجنتین هه‌می جاران چاڤێن وی پردبوون ل رۆندكان هه‌رده‌ما نازناڤه‌ك ژده‌ستدابوو، هه‌می ئۆمێد و خه‌ونا وی ئه‌وبوو كو نازناڤه‌كێ بۆ نیشتیمانێ خوه‌ببه‌ت، هه‌یا ئاماده‌بوو ته‌ڤ نازناڤێن خوه بگوهۆریت ب نازناڤه‌كێ بۆ نیشتیمانێ خوه، ل داویێ گه‌هشته خه‌ونا خوه و نازناڤه‌ك بۆ نیشتیمانێ خوه‌بر، مێسی هه‌ر تشت بۆ نیشتیمانێ خوه‌كر بێی ببێژیت كو نیشتمانێ وی ل ته‌نگاڤیان دا چ بۆ نه‌كریه!
كریستیانۆ رۆنالدۆ ئه‌فسانه‌یێ دیارێ ته‌پاپێ، هێشتا كورپه‌له‌بوو ژبه‌ر هه‌ژاریێ ل نیشتیمانێ خوه‌دا دایكا وی هه‌ولدان ژناڤببه‌ت لێ دختوران چه‌ند جاران رێگری لێكر و په‌شیمان كر، كریستیانۆ ده‌ما چاڤێن خوه ڤه‌كرین ل هه‌ژاری و نه‌داریه‌كا سه‌خت ده‌سپێكر، ل بوهارا ته‌مه‌نێ خوه جاده‌یێن وه‌لاتێن خوه پاقژدكرن (پاقژكه‌رێ جادده‌یان) بوو هه‌می كارێن زه‌حمه‌ت دكرن، پاشان كریستیانۆ ب ماندیبوون و به‌هرا خوه بوو یاریزانه‌كێ مه‌زن و ناڤدارێ جیهانێ، ته‌ڤ نازناڤێن تاك و كۆمه‌ل بده‌ستڤه‌ئینان، لێ ڤان نازناڤان تێهنا كریستیانۆ نه‌شكاند، خه‌ونا وی یا ئێكانه نازناڤه‌كێ بۆ نیشتیمانێ خوه ببه‌ت كو ب درێژایا دیرۆكێ وه‌لاتێ وی بێ ناسناڤ و بێ ناڤونیشان بوو ل جیهانا ته‌پاپێ دا.
كریستیانۆ نه‌راوستیا نیشتمانێ بێ ناڤونیشانێ خوه ل جیهانا ته‌پاپێ دا كره ناڤه‌كێ دیار ب ناسناڤان شادكر، كره ئێك ژ باشترین هه‌لبژارتیێن جیهانێ كو ته‌ڤ هه‌لبژارتیێن دی ژێ ترسیان، ئێدی جیهانا ته‌پاپێ دا پرتوگال ژی بوو ناڤ و هاته نیاسین ژبه‌ر كریستیانۆ، چونكو به‌ری كریستیانۆ پرتوگال ناڤه‌كێ وه‌سانه‌بوو كو جهێ گوتنێ بیت پرانیا خه‌لكی ژی نه‌دزانی ولاتێكی هه‌یه ب ناڤێ پرتوگال، هه‌ڤده‌م كریستیانۆ هه‌رده‌م شانازیه‌كا بێ سنوور ب وه‌لاتێ خوه‌دبر زێده‌تر هه‌ر تشتێ دن، چو جاران گوهێ خوه نه‌دا كو نیشتیمانێ وی چ بوو نه‌كریه، به‌لكو وی هه‌رده‌م دگوت هه‌رچیا ژده‌ست من دهێت ب زێده‌هی دێ بۆ نیشتیمانێ خوه كه‌م.
كورده‌ك، كو ب درێژاییا دیرۆكێ كه‌س دلۆڤانی ب نیشتیمانێ وی نه‌بریه، نیشتیمانێ وی داگیركریه، تالانكریه، ئه‌نفالكریه، پارچه پارچه كریه هه‌ر ئێكێ پارچه‌ك بخوه بریه، هه‌رچیا خرابه ب سه‌رێ نیشتیمانێ وی ئینایه، دگه‌ل هندێ بۆ هه‌ر تشته‌كێ نه‌فره‌تێ ل نشتیمانێ خوه دكه‌ت، په‌سنا نیشتیمانێ خه‌لكێ دی دكه‌ت، هند نه‌زانین هه‌رتشت ته‌ڤلی هه‌ڤ دكه‌ین، جوداهیێ ناكه‌ین دناڤبه‌را پارتان و نیشتیمانی، به‌رپرس گه‌نده‌له نه‌فره‌تا ل نیشتیمانی دكه‌ین، حوكمه‌ت خرابه و كێماسی و گه‌نده‌لی هه‌نه هه‌ر نه‌فره‌تان ل نیشتیمانی دكه‌ین، ژبه‌ر پارتان نیشتیمانی تێر چڤین دكه‌ین، لاپه‌رێن دیرۆكێ ڤه‌ده‌ی چ ناڤان نابینی كو نه‌فره‌ت ل نیشتیمانێ خوه كربیت و په‌سنا نیشتیمانه‌كێ دی كربیت ئه‌و كه‌سه هاتبیته په‌سنه‌كرن، به‌لكو به‌ر نه‌فره‌تا زیندی و مریان كه‌فتیه ب كه‌سه‌كێ ناموباره‌ك لقه‌له‌م دایه. هه‌می ئه‌وێن ناڤێن خوه ب شانازیڤه ل دیرۆكێ تۆماركری كه‌سێن نیشتیمان په‌روه‌ربووینه نه‌ك ئه‌وێن كه‌رب و كین بۆ نیشتیمانێ خوه هه‌ی.
نۆرماله ته كه‌رب و كین بۆ پارتان هه‌بن، نۆرمالتره كه‌رب ژ حوكمه‌تێ هه‌بیت و داخوازا حوكمه‌ته‌كا باشتر بكه‌ی لێ ل چارچووڤێ نه‌ژاده‌كێ خوه نه نه‌ژاده‌كێ خه‌لكێ دی، ته كه‌رب بۆ هه‌ر تشتی هه‌بیت مافێ ته‌یه، لێ هه‌ژار و نه‌دار بی یان زه‌نگینبی و هه‌ر ئۆله‌ك بی یان بێ ئۆل بی هه‌ر تشتێ بی چ نیشتیمان ته نینن ژبلی كوردستانێ كو نیشتیمانێ هه‌ر كورده‌كێ یه، ل ده‌رڤه‌ی كوردستانێ هه‌ر نیشتیمانێ دی ب نیشتیمانێ خوه بزانی زه‌رویه‌ته پشكنینا DNA بخوه بكه‌ی، چونكو نه‌ژادێ ته دیار نینه لێ هه‌ر نه‌ژاده‌ك بی كورد نینی.
وەڵام بدەوه