گوتەبێژی وەزارەتی شەهیدان ئاشکرای کرد، لە دواکۆبوونەوەی ئەنجوومەنی وەزیران پێشنیار دراوەتە حکوومەت لەبری زەوی، شوقە بدرێتە کەسوکاری شەهیدان و لایەنە پەیوەندارەکانیش ڕاسپێردراون.
عادل مەلا ساڵح، گوتەبێژی وەزارەتی شەهیدان و ئەنفالکروان، بە ماڵپەڕی فەرمیی پارتی دیموکراتی کوردستانی ڕاگەیاند: "ساڵانی ڕابردوو دەیان هەزار پارچەزەوی بەسەر کەسوکاری شەهیداندا دابەش کراون و هێشتا ژمارەیەکی زۆریش ماون بۆ وەرگرتنی زەوی. بەپێی یاسا ئەرکی حکوومەتە زەوی و یەکەی نیشتەجێبوون بۆ کەسوکاری شەهیدان دابین بکات، بەشێکی دیکەی کەسوکاری شەهیدان ڕەزامەندییان هەیە بۆ پێدانی زەوی.''
گوتەبێژی وەزارەتی شەهیدان گوتیشی: "لە دواکۆبوونەوەی ئەنجوومەنی وەزیران وەزیری شەهیدان داوای کردووە لەبری زەوی، شوقە بۆ کەسوکاری شەهیدان دروست بکرێت و سوودمەند بن لە یەکەی نیشتەجێبوون.''
عادل مەلا ساڵح ئاماژەی بۆ ئەوەش کرد: ''لایەنە پەیوەندیدارەکان ڕاسپێردراون بۆ ئەوەی کار لەسەر پێشنیارەکە بکەن، چونکە وەزارەتی شەهیدان و شارەوانی پێداچوونەوە دەکەن و لیژنەیەکی باڵاش پێک هاتووە تا کار بۆ دروستکردنی ئەو شوقانە بکرێت و کەسوکاری شەهیدان سوودمەند بن، بەبێ بەرامبەریش شوقەیان بۆ دروست دەکرێت.
وەڵام بدەوه