کاتئ شەپۆلێکی بەهێزی بارانبارین راگەیاندرا

لە کۆتایی ئەم مانگە و سەرەتای مانگی داهاتوودا، شەپۆلێکی بەهێزی بارانبارین و هەورەبروسکە هەرێمی کوردستان و عێراق دەگرێتەوە. شارەزایانی کەشناسی پێشبینی دەکەن ئەم شەپۆلە کۆتایی بەو ترسە بهێنێت کە باسی لە دواکەوتنی وەرزی بارانبارین و پەڵەدان دەکرد.
هەڤاڵ سدیق گەڵۆزی، شارەزای کەشناسی ڕایدەگەیەنێت؛ شەپۆلەکە لە ئەنجامی یەکگرتنی دوو نزمەپەستانی دەریای سپیی ناوەڕاست و دەریای سوورەوە دروست دەبێت. بەهۆیەوە ئەو بەرزەپەستانەی ئێستا بەسەر ناوچەکەدا زاڵە تێکدەشکێت و گۆڕانکاری بەسەر کەشوهەوادا دێت.
ئەو شارەزایەی کەشناسی ئاماژە بەوە دەکات، بارانەکە بۆ زەوییە کشتوکاڵییەکان سوودبەخش دەبێت و پێشبینییەکانی دواکەوتنی پەڵە تا مانگی دوانزە ڕەتدەکاتەوە.  چاوەڕوان دەکرێت لە ناوەڕاستی هەفتەی داهاتوودا کاریگەرییەکانی ئەم گۆڕانکارییە لە کەشوهەوادا بە ڕوونی دەربکەون.