هاوڵاتییان ئاگاداردەکرێنەوە

هێشتا وەرزی سەرما لە هەرێمی کوردستان دەستیپێنەکردووە، نرخی سووتەمەنی هەڵکشانێکی بەرچاوی بەخۆیەوە بینیوە و لە ئێستادا نرخی هەر بەرمیلێک نەوتی سپیی ماڵان لە بازاڕەکاندا 250 هەزار دیناری تێپەڕاندوە
لە هەمان کاتدا، بەڕێوەبەرایەتیی نەوت و کانزاکانی سلێمانی ڕایدەگەیەنێت کە تاوەکو مانگی داهاتوو هیچ ڕێنماییەکی فەرمی بۆ دابەشکردنی نەوتی پاڵپشتیکراوی حکومی ڕانەگەیێندرێت. 
ئەمەش لە کاتێکدایە لە هەمان ماوەی ساڵی ڕابردوودا نرخی بەرمیلێک نەوت تەنیا 120 هەزار دینار بوو، بازرگانانی سووتەمەنیش هۆکاری ئەم گرانبوونە بۆ بەرزبوونەوەی نرخی کۆ لە سەرچاوەکان دەگەڕێننەوە.
سەلام عومەر، وتەبێژی نەوت و کانزاکانی سلێمانی ئاماژەی بەوە کرد کە تاوەکو ئێستا لە هیچ ناوچەیەکی هەرێمی کوردستان دابەشکردنی نەوت دەستیپێنەکردووە، بەڵام چاودێڕی دەکرێت لە مانگی تشرینی یەکەمدا (مانگی 10) وەزارەتی سامانە سرووشتییەکان ڕێنماییەکانی دابەشکردنی نەوت بە نرخی پاڵپشتیکراو (کە ساڵانی ڕابردوو 200 لیتر بە 104 هەزار دینار بوو) ڕابگەیەنێت وبەمەش نرخی نەوت لە بازاڕەکاندا دادەزێت، بۆ لە ئێستادا واباشترە نەوت نەکڕن.
لەلایەکی دیکەوە، کەمال محەممەد، وەزیری سامانە سرووشتییەکان ڕایگەیاندووە کە ساڵانی ڕابردوو بەغدا تەنیا 50 ملیۆن لیتری بۆ هەرێم ناردووە، بۆ ئەمساڵیش داوایان کردووە پشکی هەرێمی کوردستان هاوشێوەی پارێزگاکانی دیکەی عێراق بنێردرێت تاوەکو بتوانن بەسەر هاوڵاتیاندا دابەشی بکەن.