بڕیاری کۆتایی درا

پێشمەرگە هێزێکی یاسایی یە، چەکدانان ناگرێتەوە. 
 قاسم ئەعرەجی، راوێژکاری ئەمنی سەرۆکوەزیرانی عێراق رایگەیاند: هێزی پێشمەرگەی کوردستان هێزێکی یاساییە و پرۆسەی کۆنترۆڵکردنی چەک کە حکوومەتی عێراق کاری بۆ دەکات، پێشمەرگە ناگرێتەوە.
ئەعرەجی جەختی کردەوە: هەوڵەکانی حکوومەت بۆ کۆنترۆڵکردنی چەک تەنیا ئەو گرووپ و هێزانە دەگرێتەوە کە لە دەرەوەی دەستوور و یاسا کار دەکەن.
 سەبارەت بە بوونی پەکەکە لە عێراق، راوێژکاری ئەمنی سەرۆکوەزیرانی عێراق روونی کردەوە: بوونی ئەو هێزە لەسەر خاکی عێراق نایاساییە و بەغدا لەگەڵ تورکیا کار دەکات بۆ چارەسەرکردنی ئەو دۆسیەیە.
ئەعرەجی ئاماژەی بەوە کرد: کشانەوەی هێزەکانی هاوپەیمانان لە 30ـی ئەیلوول بە واتای پچڕانی پەیوەندی لەگەڵ واشنتن نییە و عێراق بەردەوام دەبێت لە گۆڕینەوەی زانیارییە ئەمنییەکان لەگەڵ ئەمریکا.