دوو گەنجی دیکە لە زێی گەورە خنکان

دوو گەنجی دیکە لە زێی گەورە خنکان و گەڕان بەدوای تەرمەکانیان بەردەوامە
دوو هاووڵاتیی عەرەب لە کاتی مەلەکردندا لە زێی گەورە خنکان و بەمەش ئاماری خنکان لەمساڵدا لە سنووری پارێزگای هەولێر گەیشتە ١٩ کەس.
ڕووداوەکە کاتژمێر ١:٤٥ خولەکی پاشنیوەڕۆی ئەمڕۆ ڕوویداوە، کاتێک دوو گەنج بەمەبەستی مەلەکردن چوونەتە ناو زێی گەورە. قوربانییەکان بە ڕەگەز عەرەبن و دانیشتووی گەڕەکی سەرکارێزن لە شاری هەولێر، و تا ئامادەکردنی ئەم هەواڵە، تیمە جێگیرەکانی چاودێری و گەڕانی بەرگریی شارستانیی هەولێر لە هەوڵی بەردەوامدان بۆ دۆزینەوە و دەرهێنانی تەرمەکانیان.
بە تۆمارکردنی ئەم دوو حاڵەتە، ئاماری قوربانیانی ڕووداوەکانی خنکان لە سنووری پارێزگای هەولێر لە سەرەتای ئەمساڵەوە بەرزبووەوە بۆ ١٩ کەس، کە چوار کەسیان لە بەنداوەکان و ١٥ کەسەکەی دیکەشیان لە چەم و ڕووبارەکاندا خنکاون.