خراب لە دکتۆر عەبدوللەتیف قەوما

خوێندکارانی کۆلێژی زانستە ئیسلامییەکانی زانکۆی سلێمانی، بەیاننامەیەکیان سەبارەت بە کەیسی (د. عەبدولـلەتیف ئەحمەد) بڵاوکردەوە و سوپاسی وەزارەتی خوێندنی باڵا و سەرۆکایەتیی زانکۆی سلێمانی دەکەن بۆ هەڵوێستی یاسایی و بێلایەنانەیان لە چەسپاندنی دادپەروەری و پاراستنی شکۆی زانکۆ و خوێندکاران.
لە بەیاننامەیەکدا کە ئاراستەی ڕای گشتی و تەواوی ناوەندە ئەکادیمی و میدیاییەکان کراوە، خوێندکارانی کۆلێژی زانستە ئیسلامییەکان ڕایدەگەیەنن، دوای ئەو ڕووداوانەی ئەم دواییە کە پەیوەست بوون بە مامۆستا (د. عەبدولـلەتیف ئەحمەد - سەلەفی)، لە سۆنگەی بەرپرسیارێتیی ئەخلاقی، یاسایی و زانستییانەوە، پێزانینی خۆیان بۆ وەزیری خوێندنی باڵا، سەرۆکایەتیی زانکۆی سلێمانی و لیژنەی لێکۆڵینەوەی زانکۆکە دەردەبڕن کە بەدواداچوونی ورد و پیشەییان بۆ کەیسەکە کردووە.
لە بەشێکی دیکەی بەیاننامەکەدا هاتووە، ئەو لایەنانە ڕۆڵی سەرەکی و کاریگەریان هەبووە لە پشتگیریکردنی حەق و چەسپاندنی دادپەروەری لە ناوەندی زانکۆدا. هەروەها جەخت لەوە دەکەنەوە کە حەق و ڕاستی هەمیشە سەردەکەوێت و کۆلێژەکەیان وەک ناوەندێکی پێگەیاندنی زانست و مەعریفە و بەها باڵاکان دەمێنێتەوە، و ڕێگە بە هیچ لادانێک لەو بنەمایانە نادرێت.