تەنها یەک هوفتە مۆلەت ماوە

​دەستەی وەبەرھێنانی ھەرێمی کوردستان لە ئاگادارییەکدا ڕایگەیاند، پاش ڕاسپاردەی مەسرور بارزانی، سەرۆکی حکوومەتی ھەرێمی کوردستان، دەست بە پڕۆسەی بەبازاڕکردنی گەنمی جووتیاران کراوە و دەرگای وەرگرتنی داواکاری بۆ ھەناردەکردنی گەنم بۆ دەرەوەی وڵات کراوەتەوە.
​ئەمڕۆ چوارشەممە، ١٠ـی حوزەیرانی ٢٠٢٦، دەستەی وەبەرھێنان ئاشکرای کرد، سەرجەم ئەو جووتیار و کۆمپانیایانەی ئارەزوومەندن گەنمی ھەرێمی کوردستان ھەناردەی دەرەوە بکەن، دەتوانن لە ئێستاوە داواکاریی فەرمیی خۆیان پێشکەش بە دەستەی وەبەرھێنان بکەن بە مەبەستی وەرگرتنی ڕەزامەندی.
​دەستەکە جەختی لەوە کردەوە، کە ئەم ھەنگاوە لەپێناو خزمەتکردنی زیاتری جووتیاران و بەبازاڕکردنی بەرھەمەکانیانە. ھاوکات ئاگادارییەکی خێرایان بڵاو کردەوە کە وادەی پێشکەشکردنی داواکارییەکان سنووردارە و تەنیا (٧) حەوت ڕۆژی لەبەردەمە لە ڕێکەوتی بڵاوکردنەوەی ئەم ئاگادارییەوە.
​جێگەی ئاماژەیە، ئەم بڕیارە وەک بەشێک لە بەرنامەی حکوومەتی ھەرێم دێت بۆ گرنگیدان بە سێکتەری کشتوکاڵ و دۆزینەوەی بازاڕی نوێ بۆ بەرھەمی خۆماڵی، تاوەکوو جووتیاران بتوانن بە نرخی گونجاو بەرھەمەکانیان ساغ بکەنەوە و ئاستی بەرھەمھێنانی گەنم لە ھەرێمدا زیاتر پەرە بستێنێت.