فەرمانبەران ئاگاداردەکرێنەوە

د. ئەحمەد ئەنوەر، سەرۆکی دەستەی دەستپاکیی هەرێمی کوردستان لە کۆنگرەیەکی ڕۆژنامەوانیدا ڕایگەیاند، بەپێی یاسای دەستەی دەستپاکی، پاداشتی ئەو کەسانە دەکەن کە زانیاریی دروست و بەڵگەدار لەسەر بوونی گەندەڵی دەدەنە دەستەکەیان.
بە مەبەستی هاندانی هاووڵاتییان بۆ ڕووبەڕووبوونەوەی گەندەڵی و ڕێگریکردن لە بەهەدەردانی سامانی گشتی، نووسراوی فەرمییان ئاراستەی سەرجەم سەرۆکایەتییەکان و دامەزراوەکانی هەرێمی کوردستان کردووە. سەبارەت بە بڕی پاداشتەکە، سەرۆکی دەستەی دەستپاکی ئاماژەی بەوە کرد کە هێشتا پێوەرێکی جێگیر بۆ پاداشتەکە دیاری نەکراوە، بەڵام بە شێوەیەکی گشتی بڕەکەی بەپێی قەبارەی گەندەڵییەکە دەبێت؛ واتە تاوەکو ئەو گەندەڵییەی ئاشکرا دەکرێت گەورەتر بێت، پاداشتێکی زیاتری بۆ دادەنرێت.  سەرۆکی دەستەی دەستپاکی دڵنیایی تەواو بە هاووڵاتییان دەدات کە لە کاتی ئاشکراکردنی هەر گەندەڵییەکدا، بە هیچ جۆرێک ناوی کەسەکە ناهێنرێت و زانیارییەکانی بە نهێنی دەمێننەوە. هاووڵاتییان دەتوانن بەبێ دوودڵی لە ڕێگەی ئەم سێ کەناڵەوە پەیوەندییان پێوە بکەن و زانیارییەکانیان بدەن:
پەیوەندیکردن بە هێڵی گەرمی ژمارە 1015.
ناردنی بەڵگەکان بۆ ئیمەیڵی: destpaki.hotline@yahoo.com
سەردانیکردنی ڕاستەوخۆی بارەگا و ئۆفیسەکانی دەستەی دەستپاکی.