پارتی بە تووندی هاتە دەنگ

فراکسیۆنی پارتی دیموکراتی کوردستان بە توندترین شێوە هێرشە تاوانکارییەکانی میلیشیا و گرووپە چەکدارە دەرچوو لەیاسا و دەسەڵاتی دەوڵەت ئیدانە ومەحکوم دەکات، کە هەرێمی کوردستانیان بەئامانج گرتووە بە هێرش کردنە سەر ناوچە نیشتەجێییەکان و شوێنە گشتییەکان، کە بووە هۆی برینداربوون و زیانگەیشتن بە هاوڵاتیانی بێتاوان.
ئەم هێرشانە کردارێکی تیرۆری ئاشکرا و پێشێلکردنی گەورەی دەستور و سەروەری دەوڵتن و جارێکی تر مەترسیی چەکی بێکۆنترۆڵ دەردەخەن ، کە بووەتە هەڕەشەیەکی ڕاستەوخۆ بۆ ئاسایشی هاوڵاتیان و سەقامگیری وڵات ، 
ئامانجگرتنی شارەکان و ماڵە ئارامەکانی هەرێمی کوردستان تاوانێکی قێزەون ومەحکومکراوە بە هەموو پێوانەیەک و بێ سەرکۆنەکردن ولیپرسینەوە تێ ناپەڕێت ،
لەبەر ئەم هەڵچوونە مەترسیدارە، داوا لە حکومەتی فیدراڵ دەکەین بە هەنگاوی خێرا و یەکلاکەرەوە کار بکات بۆ کۆتاییهێنانی ئەم گرووپە توندڕەو و دەرچوو لە یاسایانە، هەروەها دۆزینەوە و دادگاییکردنی ئەو لایەنانەی بەرپرسیارن لەم هێرشانە و ڕێگە نەدان بە هیچ هێزێکی چەکدار بۆ کارکردن لەدەرەوەی چوارچێوەی دەوڵەت ، 
بەردەوامبوونی ئەم هێرشانە بێ ڕاگرتنێکی ڕاستەقینە، لاوازکردنی مەترسیداری شکۆى دەوڵەتە لەخۆیدا و پرسیاری جدی دروست دەکات لەسەر توانای حکومەت بۆ جێبەجێکردنی یاسا و پاراستنی هاوڵاتیان.
فراکسیۆنی پارتی دیموکراتی کوردستان
ئەنجومەنی نوێنەرانی عێراق