دابەشکردنی زەوی دەست پێدەکاتەوە

دابەشکردنی زەویی فەرمانبەران دەست پێدەکاتەوە و لە هەردوو سنووری سەرۆکایەتیی شارەوانیی هیران و شەقڵاوە فەرمانبەر و هێزە ئەمنییەکان و خانەنشینان زەوی وەردەگرن و بەرپرسێكی شارەوانیش وردەكارییەكەی ئاشكرا دەكات.
مەریوان حاکم هادی، بەڕێوەبەری گشتیی شارەوانییەکانی هەولێر ڕاگەیاند: "لەم هەفتەیەدا لە سنووری سەرۆکایەتیی شارەوانی شەقڵاوە و هیران زەوی دابەش دەکرێت."
مەریوان حاکم هادی جەختی کردەوە: " لەم پڕۆسەیەدا سێ هەزار و 100 فەرمانبەر فەرمانبەری شارستانی و سەربازی و خانەنشینانیش سوودمەند دەبن و دەبنە خاوەنی زەوی خۆیان."
ئاشكراشی كرد، دابەشكردنی زەوییەكانیش لە دوو شوێن دەبێت: "ئەوانەی كارتی زانیارییان هیرانە لە شوێنێك وەردەگرن كە ناوی دەربەندە لە نێوانی شەقڵاوە و هیرانە، ئەوانەی شەقڵاوەش لە میراوە زەوی وەردەگرن كە لە نێو خەڵك بە كاوانیان ناسراوە."
مەریوان حاکم هادی دووپاتی كردەوە: " ئەو زەوییانەی دەدرێتە فەرمانبەران لە دوو باشترین شوێنی هیران و شەقڵاوەیە."
بەڕێوەبەری گشتیی شارەوانییەکانی هەولێر، گوتیشی: "تاوەکوو ئێستا دوای بڕیارەکەی سەرۆکی حکوومەتی هەرێمی کوردستان، لە سنووری ئێمه، بە هەزار پارچە زەوی دابەش کراوە و پڕۆسەکەش بەردەوام دەبێت."