مەسروور بارزانی و بەرپرسێکی باڵای ئەمریکا جەخت لە ناردنی مووچە و شایستە داراییەکانی هەرێم دەکەنەوە
ئەمڕۆ سێشەممە 1/13، مەسروور بارزانی، سەرۆکی حکومەتی هەرێمی کوردستان پێشوازی لە جۆشوا هاریس، هەڵسوڕێنەری باڵیۆزخانەی ئەمریکا لە عێراق کرد. لە کۆبوونەوەکەدا، کە کونسوڵی گشتیی ئەمریکاش ئامادەی بوو، برەودانی زیاتر بە پەیوەندییە دوولایەنەکان و دۆخی گشتیی عێراق و دانوستانی لایەنە سیاسییەکان بۆ پێکهێنانی کابینەی نوێی حکومەت تاووتوێ کرا.
لە بەشێکی دیکەی دیدارەکەدا، هەردوولا هاوڕا بوون لەسەر گرنگیی ڕێزگرتن لە قەوارەی دەستووری و فیدراڵیی هەرێمی کوردستان. جەخت لەسەر دابینکردنی ماف و شایستە داراییەکانی هەرێم و بەردەوامبوونی ناردنی مووچەی مووچەخۆران لەلایەن حکومەتی فیدراڵەوە کرایەوە، بە جۆرێک کە مووچەی مانگەکانی 11 و 12ی ساڵی ڕابردووش بگرێتەوە و کێشە داراییەکان چارەسەر بکرێن.
لای خۆیەوە، هەڵسوڕێنەری باڵیۆزخانەی ئەمریکا پشتیوانیی وڵاتەکەی بۆ هەرێمی کوردستان و بە تایبەتی بۆ پڕۆسەی چاکسازییەکانی حکومەت لە کەرتە جۆراوجۆرەکاندا دووپات کردەوە. ئاماژەی بەوەش دا کە هەرێمی کوردستان هاوبەش و هاوپەیمانێکی بەهێز و گرنگی ئەمریکایە لە ناوچەکەدا. لە بەرامبەردا، سەرۆکی حکومەت سوپاسی پشتیوانییە بەردەوامەکانی ویلایەتە یەکگرتووەکانی ئەمریکای کرد.
لە کۆتایی کۆبوونەوەکەدا، دوایین گۆڕانکاری و پەرەسەندنەکانی دۆخی گشتیی ناوچەکە و کاریگەرییان لەسەر ئاسایش و سەقامگیری خرانە بەرباس. هەردوولا جەختیان لە گرنگیی هەماهەنگیی بەردەوام کردەوە بۆ ڕووبەڕووبوونەوەی تەحەددییات و پاراستنی بەرژەوەندییە هاوبەشەکان لەم قۆناغەدا.
وەڵام بدەوه