ئەندامێكی كۆمیتەی ناوەندیی پارتی دیموكراتی كوردستان رای دەگەیەنێت كە لە كۆبوونەوەی ئەمڕۆی كۆمیتەكەدا بڕیاری پێكهێنانی شاندێك بۆ گفتوگۆكردن لەبارەی پێكهێنانی حكوومەتی فیدرالیی عێراق دراوە.
جوان رۆژبەیانی، ئەندامی كۆمیتەی ناوەندیی پارتی ئاماژەی بەوە كرد كە ئەمڕۆ پێنجشەممە ١٨ی ١٢ی ٢٠٢٥، كۆمیتەی ناوەندیی پارتی بە سەرپەرشتیی سەرۆك بارزانی و ئامادەبوونی هەردوو جێگرانی سەرۆكی پارتی كۆبوونەوە و گفتوگۆیان لەبارەی دەرئەنجامەكانی هەڵبژاردن كرد.
ئەوەشی ئاشكرا كرد كە لە كۆبوونەوەكەدا دوو شاندی دانوستانكار بۆ گفتوگۆكردن لەسەر پێكهێنانی هەردوو حكوومەتی فیدرالی لە عێراق و هەرێمی كوردستان دراوە.
جوان رۆژبەیانی ئەوەی خستە ڕوو: ”شاندێكیان تایبەتە بە پێكهێنانی حكوومەتی هەرێمی كوردستان، هەمان شاندەكەی پێشوو دەبێت، بەردەوامی بە گفتوگۆكان دەدرێت، بەڵام ئەمجارەیان بەپێی شایستەی هەڵبژاردن دەبێت، لەوانەیە شێوازی گفتوگۆكە زۆر جیاواز تر دەبێت لەوەی پێش هەڵبژاردن.“
جەختیشی كردەوە: ”شێوازی دابەشكردنی پۆستەكان گفتوگۆی لەسەر دەكرێ، بەڵام ئەگەر پێشووتر پارتی سازشی لەسەر هەندێك پۆست كردبێت بۆ راگرتنی باڵانس و پێكهێنانی حكوومەت، لەوانەیە ئەمجارەیان شێوازی گفتوگۆكە و ئەو دڵڕاگرتنە وەكوو پێشتر نەمێنێت، بەپێی ئیستحقاق و دەنگی پارتی و دەنگی لایەنەكانی تر گفتوگۆ لەسەر پۆستەكان دەكرێت.“
ئاماژەی بەوەش كرد كە لێژنەیەكی تایبەت بۆ گفتوگۆكردن لەگەڵ بەغدا دروست كراوە، لە ماوەیەكی زۆر نزیكدا ئەم شاندە دەست بە گفتوگۆكانیان دەكەن لەگەڵ عێراق.
لەبارەی پۆستی سەركۆماریش، جوان رۆژبەیانی گوتی: ”پۆستی سەركۆمار پشكی كوردە، مەرج نییە بۆ پارتی بێت یان بۆ یەكێتی بێت، لە دانوستانەكاندا گفتوگۆی لەسەر دەكرێت.“
وەڵام بدەوه