بیست و سێ بەنزینخانە داخران

تیمەكانی بەڕێوەبەرایەتیی نەوت و كانزاكانی هەولێر، 23 بەنزینخانەیان داخست و بە 33 ملیۆن دینار سزای دارای چەندان بەنزینخانەشیان دا.

سالار محەمەد لێپرسراوی بەشی پشكنین لە بەڕێوەبەرایەتیی نەوت و كانزاكانی هەولێر رای گەیاند، ماوەی مانگی نۆدا تیمەكانمان پشكنین و بەدواداچوونیان بۆ سەتان بەنزیخانەی هەولێر كردووە، 23 بەنزینخانە سزا دراون، لەگەڵ سزای پێبژاردن كە تێكڕا نزیكەی 33 ملیۆن دینار بووە."

تیمەكانی بەڕێوەبەرایەتیی نەوت و كانزاكانی هەولێر، ڕۆژانە سەردانی سەرووی 40 بەنزینخانە دەكەن و نموونەی بەنزینەكەیان دەبرێتە تاقیگە، ئەگەر ئۆكتانی بەنزینەكە لە نمرەی ستاندارد نەبێت و هەر سەرپێچییەكی تر لە بەنزیخانەكە ببینرێت، سزای دارایی دەدرێت و دادەخرێت، چەند سەرپێچییەكەی گەورە بێت، سزاكە قورستر دەبێت.

لەگەڵ ئەوەشدا خەڵك بەردەوام گلەییان لە كوالێتی بەنزین هەیە، بەتایبەت بەنزینخانەكانی حكوومەت ئەوانەی بەنرخی پاڵپشتیكراو دەدرێنە شۆفێران.

لە سەنتەری شاری هەولێر و دەوروبەری 260 بەنزینخانە هەن، هەر بەنزیخانەیەك بەنزینەكەی لە پشكنین دەرنەچێت، لەلایەن تیمەكانی بەڕێوەبەرایەتیی نەوت و كانزاكانی هەولێر دادەخرێت، 250 هەزار بۆ سێ ملیۆن دینار سزا دەدرێت.