وەزیری گواستنەوە و گەیاندن رایدەگەیێنێت، 1-8-2021 دوایین مۆڵەتە تاوەکو شۆفێرانی تاکسی مامەڵەکانی لێدانی لۆگۆی تاکسی و دەرهێنانی کارتی زانیاریی تاکسی تەواو بکەن و وەزارەتی ناوخۆش ئێستا لێکۆڵینەوە لەسەر داواکاریی کارمەندەکانی دەکات، تاوەکو رێگەیان پێبدرێت کاری تاکسی بکەن و بتوانن لۆگۆی تایبەت و فەرمی لە ئۆتۆمبێلەکانیان بدەن.
لێدانی لۆگۆ و دەرهێنانی کارتی زانیاریی تاکسی پرۆژەیەکی وەزارەتی گواستنەوە و گەیاندنە کە پێش بڵاوبوونەوەی کۆرۆنا لە ساڵی 2019 دەستیپێکراوە، بەڵام "بەهۆی کێشەی کۆرۆنا و کەرەنتین و راگرتنی داتابەیسەکەی وەستابوو". ئانۆ جەوهەر، وەزیری گواستنەوە و گەیاندن بە رادیۆی رووداوی راگەیاند، "ئێستا جارێکی دیکە دەستیپێکردووەتەوە."
لە هەولێر، دهۆک و لە سلێمانی لۆگۆ و کارتی زانیاریی تاکسی جێبەجێدەکرێت. هەر شارێک رەنگ و لۆگۆی خۆی هەیە و تاکسیی ناوەندی شارەکانیش لۆگۆ و لەزگەی تایبەت بە خۆیان هەیە. ئانۆ جەوهەر گوتی، "ئەمەش بۆ ئەوەیە تاکسییەکانی هەولێر لە هەولێر کار بکەن، ئەوانەی دهۆک لە دهۆک کار بکەن و تاکسییەکانی سلێمانیش لە سلێمانی کار بکەن. هەروەها ئەوانەی ناوەندی شارەکانیش تەنیا لە ناوەندی شارەکان کار بکەن".
سەبارەت بە کارتی زانیایی تاکسییەکانیش، ئانۆ جەوهەر دەڵێت، کارتی زانیاری "زۆر زۆر گرنگە" بۆ ئەوەی کە هەر شۆفێرێکی تاکسی کاتێک دەچێتە بەڕێوەبەرایەتی بەڵگەی تاوان پرسی پەنجەمۆر و هەموو ئەو شتانە دیاری دەکرێت کە ئایا ئەو شۆفێرە پێشتر هیچ کێشەیەکی یاسایی یان تاوانێکی دەستدرێژی هەیە، "ئەگەر هەیە ئەوە ناتوانێت ببێتە شۆفێری تاکسی، ئەگەریش نیەتی، داتابەیسەکەی بۆ دەکرێت و دەچێتە نێو سیستمەکە."
سەبارەت بە داواکاریی کارمەندانی حکومی تایبەت کارمەندەکانی سەر بە وەزارەتی ناوخۆ و پێشمەرگە بۆ ئەوەی رێگەیان پێبدرێت کاری تاکسی بکەن، ئانۆ جەوهەر دەڵێت "ئێمە نووسراوێکمان ئاراستەی وەزیری ناوخۆ کردووە بە تێڕوانینی ئێمە دەبێت گۆڕانکارییەک لەو رێنماییە بکرێت، ئێمە ناڵێین هەموو رێنماییەکە تێکڕا نەمێنێ، بەڵام دەبێت دەرفەتێکی زیاتر بدرێت بەو چینانە تاوەکو ئەوانیش بتوانن بێن بەشداری بکەن و تاکسی خۆیان لۆگۆ و رەنگی تایبەتی لێبدەن، تاوەکو کاری تاکسی ببێتە پیشەیەکی رێکخراو، ئێمە کاری لەسەر دەکەین و چاوەڕانی هاوکار و برایانمانین لە وەزارەتی ناوخۆ تاوەکو لێکۆڵینەوە لەو بابەتە بکەن، بەم نزیکانە وەزارەتی ناوخۆ لەو بارەیەوە بڕیاری خۆی دەدات."
وەزیری گواستنەوە و گەیاندنی حکومەتی هەرێمی کوردستان گوتیشی، "سیستمی لۆگۆ و شریتی تاکسی سیستمێکە زۆر رێکوپێکە و وادەکات کە قەرەباڵخی نێو شارەکان نەمێنێت. هەر شارێک تاکسییەکانی خۆی کار بکات کە باشتریشە بۆ بژێویی ژیانی شۆفێرەکان."
لە رووی ئەمنیشەوە، بە گوتەی ئانۆ جەوهەر، "دەمانباتە قۆناخێکی پێشتر کە شۆفێری تاکسییەکان لە هەر شارێک دیاردەبن کە کێن؟ داتابەیسێک و کارتێکی زانیاریی روونیان دەبێت، هەر کاتێک پۆلیس یاخود ئاسایش کە پێویستی کرد تاکسییەک رابگرن یان ژمارەکەی دەبینن یەکسەر دەزانن کە شۆفێری تاکسییەکە کێیە و هیچ کەسێک ناتوانێت تاکسییەک لێبخوڕێت جگە لە خاوەنەکانیان نەبن."
دەربارەی پرۆژە نوێیەکانی وەزارەتی گواستنەوە و گەیاندن، ئانۆ جەوهەر ئاماژەی بەوە کردووە، "دوای تەواوبوونی ئەو پرۆژەیە، پرۆژەیەکی دیکە هەیە بۆ تاکسییەکان ئەویش دروستکردنی پێوەرە بۆ هەموو تاکسییەکان و لە قۆناخی داهاتوودا دەستی پێدەکرێت." گوتیشی، "تاوەکو ئەم کارەش تەواو دەبێت ئەو کات دەتوانین بڵێین کاری تاکسی بەڕێژەیەکی باش دەبێتە پیشەیەکی رێکخراو."
دەربارەی رێکخستنی کاری پاسەکانی نێو شار، وەزیری گواستنەوە و گەیاندن ئاماژە بەوە دەکات کە پرۆژەی نوێیان بۆ ئەوەش هەیە و دەڵێت "ئەو پرۆژەیەی زیاتر ئێستا لەژێر لێکۆڵینەوەدایە ئەو پرۆژەیەیە کە گەیشتووەتە قۆناخی کۆتایی پرۆژەی ستی پاسە، دیزاینەکەی لەلایەن کۆمپانیایەکی ئیتاڵییەوە دانراوە تەنیا بڕگەیەک لە گرێبەستەکە ماوە تاوەکو ئێمە لەگەڵ ئەو کۆمپانیایە تەواوی بکەین ئەمەش دەبێتە هۆی رێکخستنی کاری پاسەکان لەنێو شارەکان."
وەڵام بدەوه