هەواڵی خۆش بۆ فەرمانبەران هات

دەنگۆی وەرگرتنی یەك ملیۆن دینار بۆ تاپۆكردنی زەوی فەرمانبەران هەیە، سەرۆكی شارەوانیی هەولێریش دەڵێت، مامەڵە بۆ تۆماركردنی زەوییەكان دەستی پێ‌ كردووە و پارەش لە فەرمانبەران وەرناگیرێت.

ئەمڕۆ سێشەم 26ـی ئاب، كارزان عەبدولهادی سەرۆكی شارەوانیی هەولێر،  رایگەیاند، بۆ بەناوكردنی زەوی فەرمانبەران ئێستە مامەڵەكان دەستی پێ كردووە.

زیاتر گوتی، بۆ تۆماركردنی ئەو زەوییانە لەسەر ناوی فەرمانبەران، هیچ بڕە پارەیەك وەرناگیرێت.

باسی لەوەش كرد، بەمنزیكانە قۆناغێكی تری دابەشكردنی زەوی دەست پێ‌ دەكات و ئێستە سەرقاڵی ئامادەكارین.

لەبارەی دابەشكردنی كارت یان كردنیان بە كارت بۆ ئەو زەوییانەی دابەش كراون رای گەیاند، چیتر كارت دابەش ناكەین، كار لەسەر ئەوە دەكەین وێنەی تۆماریان بۆ دەكرێت و راستەوخۆ بەناوی فەرمانبەر دەكرێت.

روونی كردەوە، ئەزموونمان هەیە و نامانەوێت ئەوەی پێشتر هەبوو ئێستە دووبارە ببێتەوە، چونكە پێشتر كارت كێشەی كۆمەڵایەتیی دروست كردووە.

27ی ئایاری ساڵی رابردوو مەسروور بارزانی سەرۆك وەزیرانی كوردستان، بڕیاری دا زەوی بەسەر فەرمانبەرانی كوردستان دابەش بكرێت كە لە رابردوودا سوودمەند نەبوون، قۆناغی یەكەمی پرۆسەكە لە زاخۆ و گەرمیانەوە دەستی پێ كرد، دواتر هەولێر و سلێمانی گرتەوە كە هەر پارچە زەوییەك 200 مەترە.