هەولێر سەنتەری ئابووری و بازرگانی تەواوی عێراقە

بەرپرسێكی ژووری بازرگانی و پیشەسازیی هەولێر ئاشكرای دەكات، مانگی داهاتوو شاندێكی بازرگانان و كۆمپانیاكانی ئەمریكا دێنە هەولێر.

کامەران سەڵاح باجگر، جێگری سەرۆکی ژووری بازرگانی و پیشەسازیی هەولێر راگەیاند: "بڕیاردراوە ژمارەیەك لە كۆمپانیاكانی ئەمریكا و بازرگانان و پیاوانی كاری ئەمریكی لە مانگی داهاتوودا سەردانی هەولێر بكەن، ئەم شاندەش لە سێكتەرە جۆراوجۆرەكانی ئابووری و بازرگانی و وەبەرهێنان دەبێت".

ئاماژەی بەوەش دا: "سەرەتای ئەم مانگە سەرۆکی نوێی یەکەی ئابووری لە کونسوڵخانەی گشتیی ویلایەتە یەکگرتووەکانی ئەمریکا سەردانیان كردین و ئەوەیان پێ راگەیاندین كە لە مانگی داهاتوودا، شاندەكەی بازرگان و کۆمپانیاکانی ئەمریکا، سەردانی شاری هەولێر دەکەن، چونكە ئەوان پێیانوایە هەولێر سەنتەری ئابووری و بازرگانی تەواوی عێراقە".

کامەران سەڵاح باجگر، ئەوەشی خستە ڕوو: "دەخوازین پەیوەندی و ئاڵوگۆڕە بازرگانیەکانی نێوان ئەمریکا و هەرێمی کوردستان زیاتر بێت و کۆمپانیا و وەبەرهێنەری زیاتری ئەمریکا بێنە هەرێمی کوردستان و شاندەكانی ئێمەش لە پێشانگا و چالاكییە بازرگانییەكانی ئەمریكا زیاتر بن".

بەپێی ئاماری تۆماری كۆمپانیاكانی وەزارەتی بازرگانی، 178 كۆمپانیای ئەمریكا لە هەرێمی كوردستان تۆمار كراون.