بەهۆی ئەو شەپۆلی خۆڵبارینەی کە ڕووی لە شارەکانی هەرێمی کوردستان کردووە و بووەتە هۆی کەمبوونەوەی ئاستی بینین، بەڕێوەبەرایەتیی هاتووچۆی سلێمانی هۆشداری دەداتە شۆفێران و داوایان لێدەکات بەوپەڕی بەرپرسیارێتییەوە شۆفێری بکەن و پابەندی ڕێنماییەکان بن.
لە ڕاگەیەنراوێکدا، هاتووچۆی سلێمانی داوا لە شۆفێران دەکات بۆ پاراستنی سەلامەتیی گیانی خۆیان و هاووڵاتییان، پابەندی ئەم خاڵانە بن:
- کەمکردنەوەی خێرایی ئۆتۆمبێل.
-پاراستنی ماوەی سەلامەتی لەنێوان ئۆتۆمبێلەکاندا.
- داگیرساندنی گڵۆپی تەم.
- بەکارهێنانی ماسک بۆ پاراستنی تەندروستی.
هەروەها ڕاگەیەنراوەکە بە تایبەتی هۆشداری دەدات سەبارەت بە ناوچە شاخاوییەکان و ڕێگاکانی دەرەوەی شار و داوا دەکات: "تا دەکرێت ئەو ڕێگایانە بەکارنەهێنرێت و گەشتەکان دوابخرێن تا ئەو کاتەی ئەم شەپۆلی خۆڵبارینە کۆتایی دێت."
لە کۆتاییدا، هاتووچۆی سلێمانی هیوای سەلامەتیی بۆ هەمووان خواستووە و ژمارەی هێڵە گەرمەکانیشی بڵاوکردووەتەوە بۆ ئەوەی هاووڵاتییان لە کاتی پێویستدا پەیوەندییان پێوە بکەن، لەوانە: 188 بۆ کۆنترۆڵی هاتووچۆ، 115 بۆ بەرگریی شارستانی، و 104 بۆ پۆلیسی فریاکەوتن.
وەڵام بدەوه