بانکی نیشتمانی هەرێمی کوردستان دادەمەزرێت دەدات

ئەندامێكی لیژنەی دارایی ئەنجوومەنی نوێنەران رای گەیاند: حكوومەتی هەرێم لە هەوڵدایە بانكێكی بازرگانیی بەناوی "نیشتمان" دابمەزرێنێت وەك بانكێكی حكوومی. دەشڵێت بە كردنەوەی ئەو بانكە، دەتوانێت قەرز و پێشینە بدات بە هاووڵاتییان.

د. نەرمین مەعرووف ئەندامی لیژنەی دارایی ئەنجوومەنی نوێنەران، بەمیدیای حزبەكەی راگەیاند: هەوڵەكان بەردەوامن بۆ ئەوەی هاووڵاتییانی هەرێمی كوردستان بەتایبەت مووچەخۆران، هاوشێوەی خەڵكی ناوچەكانی تری عێراق سوود لە هەموو ئەو قەرز و پێشینانە وەربگرن، كە لە ماوەی رابردوودا بەسوودێكی كەم بە هاووڵاتییان دراوە.

گوتیشی: یەكێك لەو شێوازانەی هەوڵی بۆ دراوە، كردنەوەی لقی هەردوو بانكی رەشید و رافیدەینە لە شارەكانی هەرێمی كوردستان. راشی گەیاند: بە كردنەوەی لقی ئەو دوو بانكە و بەبانكیكردنی مووچەی فەرمانبەرانی هەرێم، مووچەخۆران دەتوانن داوای قەرز و پێشینەكان بكەن، ئەویش بۆ دابینكردنی یەكەی نیشتەجێبوون و نۆژەنكردنەوەی خانووەكانیان و جێبەجێكردنی پڕۆژەی كارەبا بە وزەی خۆر و كڕینی ئۆتۆمبێل. 

ئەوەشی خستەڕوو، لە بەرانبەر بانكەكانی رافیدەین و رەشید، حكوومەتی هەرێم خۆی لە هەوڵدایە بانكێكی بازرگانیی بەناوی (نیشتمان) دابمەزرێنێت وەك بانكێكی حكوومی، بە كردنەوەی ئەو بانكە كە ئێستە لە قۆناغی ئامادەكاریدایە، هاوشێوەی بانكە بازرگانییە فیدراڵییەكان دەتوانێت قەرز و پێشینە بدات بە هاووڵاتییان.