ژمارەیەكی نەناسراو بەناوی دابینكردنی مووچەی كەمئەندامی و مووچەی چاودێریی كۆمەڵایەتی پەیوەندیی بە خەڵکەوە دەکات، لەمبارەیەوەش وەزارەتی كار و كاروباری كۆمەڵایەتی هۆشداری دەدات.
ئەمڕۆ چوارشەممە 13ی 8ی 2025، لە ڕوونكردنەوەیەكدا وەزارەتی كارو كاروباری كۆمەڵایەتی بڵاوی کردەوە: "ماوەی چەند ڕۆژێكە ژمارەیەكی نەناسراو بەناوی چاودێریی كۆمەڵایەتیی وەزارەتمانەوە پەیوەندیی بە خانەوادەی خاوەن پێداویستیی تایبەتەكان دەكات بەمەبەستی دابینكردنی مووچەی كەمئەندامی و مووچەی چاودێریی كۆمەڵایەتی."
دەشڵێت: "کەسەکە داوای ناردنی كارتی نیشتیمانی و زانیاری و پێدانی ژمارە و ناوی خەڵكی تر كە خاوەن پێداویستی تایبەت یان نەخۆش یان كەسانی بەساڵاچوویان هەبێت و دواتر بەناوی ئەوانەوە پەیوەندیی بەو خانەوادانە دەكات و داوای كارتی مۆبایل و تحویلكردنی دەكات، كە بەداخەوە ژمارەیەك هاووڵاتی زەرەرمەندیی ئەم فێڵكردنە بوونە."
وەزارەتی كار و كاروباری كۆمەڵایەتی جەخت لەوە دەکاتەوە، كە بە هەموولایەكی ڕادەگەیەنن كە "وەزارەتمان ئاگاداری ئەم بابەتە نییە و ئەمە بەشێكە لە فێڵكردن و وەزارەتمان لەكاتی پێویست لە ڕێگا فەرمییەكانەوە خزمەتگوزاری و ئاگادارییەكانی بڵاو دەكاتەوە، بەرامبەر بەم فێلكردنەی ئەم گرووپانەش ڕێكاری یاسایی دەگرینە بەر."
وەڵام بدەوه