هەواڵى خۆش بۆ هاوڵاتیانى ئەو سنورە هات

لە كۆبوونەوەیەكدا كە لە پارێزگای هەولێر بەڕێوەچوو، بڕیار درا بە چارەسەركردنی كێشەكانی كارەبا لە دەوروبەری هەولێر و ئیدارەی سەربەخۆی سۆران، هەروەها دابەشكردنی كارەبا بەشێوەیەكی یەكسان و بەبێ جیاوازی بەسەر گوند و شارۆكە و شارەدێیەكاندا.
بەگوێرەی راگەیەنراوی پارێزگار، ئومێد خۆشناو پارێزگاری هەولێر بە ئامادەبوونی هەڵگورد شێخ نەجیب سەرپەرشتیاری ئیدارەی سەربەخۆی سۆران، كۆبوونەوەیەكیان لەبارەی رەوشی كارەبای گوندەكان رێكخست. 
لە كۆبوونەوەكەدا پارێزگاری هەولێر پێداگریی لەسەر خێرا چارەسەركردنی كێشە و گرفتەكانی كارەبای لە دەوروبەری شاری هەولێر و ئیدارەی سەربەخۆی سۆران كرد و كۆنترۆڵی دابەشكردنی كارەبای هەولێریشی ڕاسپارد، ئەو بڕە كارەبایەی كە هەیە، بەشێوەیەكی یەكسان و بەبێ جیاوازی بەسەر گوند و قەزا و شارەدێكانی دەوروبەری هەولێر و ئیدارەی سەربەخۆی سۆران دابەش بكرێت.
لە بەشێكی تری كۆبوونەوەكەدا، پارێزگاری هەولێر دووپاتی لەسەر پێویستیی چارەسەری كەموكورتییەكانی كارەبا بەشێوەیەكی خێرا و زانستی و بنەڕەتی و رێگەگرتن لە زیادبەكارهێنانی كارەبا لە سنووری پارێزگای هەولێر كردەوە، كە هۆكارێكە بۆ هەڵكشانی پێوانەیی خواست و كەوتنەوەی پاڵەپەستۆ لەسەر وێستگە و تۆڕەكانی كارەبا، تا بتوانرێت بە شێوەیەكی یەكسان ئەو بڕە كارەبایەی كە بەردەستە و ئەوەشی دەگەڕێتەوە ناو تۆڕی كارەبا، دابەش بكرێت.
باس لەوەیش كرا كە سەنتەری شاری هەولێر لە دۆخێكی باشی كارەبادایە و كارەباكەی بووەتە 24 سەعاتی، كە پڕۆژەی ڕووناكی بە خێرای بەڕێوە دەچێت و چاوەڕوان دەكرێت تا مانگی 10 و 11 ئەمساڵ، تەواوی هاوڵاتییانی سنووری پارێزگای هەولێر و ئیدارەی سەربەخۆی سۆران، سوودمەندبن لە كارەبای 24 سەعاتی و پڕۆژەكە بگاتە هەموو ماڵێك.