سەرۆكی شارەوانیی شارۆكەی ئاكرێ ئاماژە دەكات كە رەزامەندی لە وەزارەتی دارایی دراوە بۆ دابەشكردنی دوو هەزار پارچە زەوی تری نیشتەجێبوون بەسەر فەرمانبەران، بەڵام هەندێك لە رێكارەكان ماون و دوای تەواوبوونیان دەست بە دابەشكردن دەكرێت، كە لە ماوەی رابردوو قۆناغێك دابەش كرا و زیاتر لە هەزار پارچە زەوی بوو .
بلند رەزا زێباری سەرۆكی شارەوانیی ئاكرێ رایگەیاند، لە قۆناغی تەواوكردنی رێكارەكانداین و مامەڵەكان تەواو دەكەین، بۆ ئەوەی قۆناغی دووەمی دابەشكردنی زەوی لە ئاكرێ دەست پێ بكەین، ئێستە نووسراوێكی دوو هەزار پارچە زەوی لای وەزارەتی دارایی حكوومەتی هەرێمە، رەزامەندی دراوە و چاوەڕوانین بگەرێتەوە، هەندێك گرفتی زەویی جووتیاران هەیە و مافی ئەوان دەدرێت و دەبێتە موڵكی شارەوانی، دواتر دەست بە دابەشكردنی دەكرێت، كە دەبێتە دووەم قۆناغی دابەشكردنی زەویی فەرمانبەران لە ئاكرێ و ئەمەش مانگێك تا دوو مانگی پێویستە .
زیاتر گوتی، لە قۆناغی یەكەمی دابەشكردنی زەوی بەسەر فەرمانبەران لە ئاكرێ، هەزار و 59 پارچە زەوی رەزامەندیی كۆن هەبوو دابەش كرا و هەزار مابوو، لە قۆناغی داهاتوو ناوی تازەش رەزامەندییان هەیە و زەوی وەردەگرن، بۆیە وەك شارەوانیی ئاكرێ بەردەوام كار دەكەین و خەریكی تەواوكردنی رێكارەكانین بۆ ئەوەی زەوی دابەش بكرێت، چونكە لە ئاكرێ زەوی پێویست لەبەردەست هەیە و كشتوكاڵییە و دەخرێتە سەر ناوی شارەوانی و شوێنی زەویەكانیش زۆر باشە و بە دڵی ئێمەیە بۆ ئەوەی بەسەر فەرمانبەران دابەش بكرێت .
وەڵام بدەوه