هۆشداری گرنگ بۆ ئەو هاوڵاتیانە هات

زیاتر لە چوار ملیۆن هاونیشتمانی لە سنووری چوار پارێزگاکەی هەرێمی کوردستان ناوی خۆیان لە سیستمی ئەلیکترۆنیی فۆرمی خۆراک تۆمار کردووە، زیاتر لە ملیۆنێک کەس ماون خۆیان تۆمار بکەن.

لە 2ی حوزەیرانی 2025ـەوە پڕکردنەوەی فۆرمی ئەلیکترۆنیی خۆراک دەستیپێکرد و بڕیارە 01ی ئاب دوایین رۆژ بێت. بەرپرسانی خۆراک دەڵێن، "10 رۆژ کات ماوە و هەرکەس ناوی تۆمار نەکات، بەشەخۆراکی دەبڕدرێت."

سیامەند قادر نانەکەلی، بەڕێوەبەری پسووڵەی خۆراکی هەولێر دەڵێت، "تاوەکو ئەمڕۆ لە ملیۆنێک و 984 کەس، ملیۆنێک و 550 هەزاریان فۆرمی ئەلیکترۆنییان پڕکردووەتەوە."

بەڕێوەبەری پسووڵەی خۆراکی هەولێر ئاماژەی بەوەکرد، پڕکردنەوەی فۆرمی خۆراک لەلایەن هاونیشتمانییانەوە بەردەوامە، بەڵام بەراورد بە رابردوو زۆر کەمیکردووە.

سیامەند نانەکەلی دەڵێت، "ئەو ژمارە کەسەی تاوەکو ئەمڕۆ فۆرمەکەیان پڕنەکردووەتەوە، بەشێکیان لە ژیاندا نەماون، بەشێکیان لە دەرەوەی وڵاتن."

هەروەها ئاراس محەممەد، بەڕێوەبەری پسووڵەی خۆراکی سلێمانی وتی، "بەگوێرەی نوێترین داتای بەردەستمان، لە ملیۆنێک و 967 هەزار و 51 هاونیشتمانی ملیۆنێک و 471 هەزار و 354 یان فۆرمی ئەلیکترۆنییان پڕکردووەتەوە کە دەبێتە 75%ـی کۆی هاونیشتمانییان."

بە وتەی ئاراس محەممەد، پڕکردنەوەی فۆرمی ئەلیکترۆنی لە سنوورەکەیان بەردەوامە؛ وتیشی، "تاوەکو ئێستا هیچ پەیامێک نییە بۆ درێژکردنەوەی کاتەکە."