کاتی گەیشتنی شاندێکی باڵای عێراق بۆ هەرێمی كوردستان ڕاگەیاندرا

بڕیاره‌ ئه‌مڕۆ یه‌كشه‌ممه‌ 1ی 6ی 2025، شاندێكی چوارچێوه‌ی هه‌ماهه‌نگی سه‌ردانی هه‌ولێری پایته‌ختی هه‌رێمی كوردستان بكه‌ن.
به‌پێی زانیارییه‌كان، مه‌به‌ستی هاتنی شانده‌كه‌ی چوارچێوه‌ی هه‌ماهه‌نگی گفتوگۆكردنه‌ له‌گه‌ڵ به‌رپرسانی هه‌رێمی كوردستان سه‌باره‌ت به‌ مووچه‌ و شایسته‌ داراییه‌كانی كوردستان.

دوای ئه‌وه‌ی وه‌زاره‌تی دارایی عێراق بێ هۆكار بڕیاری بڕینی مووچه‌ی مووچه‌خۆرانی هه‌رێمی كوردستانی دا، دوێنێ لایه‌نه‌ كوردستانییه‌كان به‌سه‌رپه‌رشتیی ده‌سته‌ی كارگێڕی مه‌كته‌بی سیاسیی پارتی دیموكراتی كوردستان له‌ پیرمام كۆ بوونه‌وه‌ و دوای كۆبوونه‌وه‌كه‌ ڕاگه‌یاندراوێكی هاوبه‌شیان بڵاو كرده‌وه‌ و له‌ به‌شێكی ڕاگه‌یاندراوه‌كه‌دا ئاماژه‌ به‌وه‌ درا بوو: "بەپێى دەستوورى هەمیشەیى عێراق و بڕیارى دادگاى فیدراڵى و یاساى فەرمانبەران و مووچەخۆرانى عێراق و ڕێککەوتنەکانى نێوان حکوومەتى هەرێم و حکوومەتى فیدراڵ، پێویستە حکوومەتى فیدراڵى پابەندبێت بە ئەرک و ئیلتیزاماتى خۆى بەرامبەر بە خەڵکى هەرێمى کوردستان و مافى مووچەخۆرانى هەرێم تێکەڵ بە ململانێ سیاسییەکان نەکرێت، هەروەها حکوومەتى فیدراڵ دوور بکەوێتەوە لە سیاسەتى برسیکردن و فشارخستنە سەر هەرێمى کوردستان، لەبەر ئەوەى ئەم سیاسەتە جگە لە قوڵکردنەوەى گرفتەکان، نادیدەگرتنى گۆڕانکارییە زۆر و خێراکانى ناوچەکەشە، بۆیە لە بەرژەوەندىی هێچ لایەکدا نابێت."