هەموو وەزارەت و فەرمانگەکان لیستی مووچەیان بە پەسندكراوی گەیاندەوە وەزارەتی دارایی، بەرپرسێكی حكوومەتیش ئاشكرای دەكات: "وەزارەتی دارایی هەوڵ دەدات ئەمڕۆ لیستەكە بۆ بەغدا رەوانە بكات."
سەرچاوەیەک لە وەزارەتی دارایی و ئابووریی حكوومەتی هەرێمی كوردستان ڕاگەیاند: "دوێنێ 24ی 5، لیستی مووچە گەڕێندرایەوە سەرجەم وەزارەتەکان بۆ پەسندكردنی، چونكە بەپێی رێكاری سیستەمی پەیڕۆڵ دەبێت لەكۆتاییدا لیستەكە بۆ وەزارەتەكان بگەڕێندرێتەوە، تاوەكوو پەسندكردنی كۆتایی بكرێت و ئەوكات بۆ وەزارەتی دارایی بگەڕێندرێتەوە."
ئاشكراشی كرد: "دوێنێ دوای نیوەڕۆ هەموو لیستەكان بە پەسندكراوی بۆ وەزارەتی دارایی گەڕێندرانەوە."
روونیشی كردەوە، تەرازووی پێداچوونەوەی مووچەی مانگی چوار و داهاتی مانگی چوار بۆ دارایی فیدراڵ نێردراوە و بە ناردنی لیستی مووچەش رێكارەكان تەواو دەبن.
سەرچاوەكەی دارایی ئەوەشی خستە ڕوو: "ئێستا هەموو شت تەواو و ئامادەیە و بڕیارە ئەمڕۆ 25ی5ی 2025، لە رێگەی تیمێكی تەكنیكی لیستەكە بۆ بەغدا رەوانە بكرێت و بدرێتە بەرێوەبەرایەتیی گشتیی ژمێركاریی دارایی فیدراڵ."
د.عەبدولحەکیم خەسرەو، سەرۆکی فەرمانگەی هەماهەنگی و بەدواداچوونی حکوومەتی هەرێمی کوردستان، راگەیاند: "ئامادەكردنی لیستی مووچەی مانگی پێنج گەیشتووەتە قۆناغی كۆتایی و وەزارەتی دارایی هەوڵ دەدات ئەمڕۆ لیستەكە بۆ بەغدا رەوانە بكات."
لە ڕۆژی19ی ئایاردا وەزارەت و فەرمانگەکان كە هەزار و 400 یەكەی ژمێریارین لە ڕێگەی سیستەمی (پەیرۆڵ)وە دەستیان بە ئامادەکردنی لیستی مووچەی مانگی پێنج کرد.
وەڵام بدەوه