ڕێکارەکانی تەمویلکردنی مووچە دەست پێدەکات

دوای هەفتەیەک وردبینی لە لیستی مووچە، ڕێکارەکانی تەمویلکردنی مووچە دەست پێدەکات، سەرچاوەیەکیش لە وەزارەتی دارایی هەرێمی کوردستان دەڵێت، "بەهەموو پێوەرێک دەبێت ئەمڕۆ تەمویلی مووچە بکرێت".
 
شاندی تەکنیکی وەزارەتی دارایی کوردستان بۆ وەڵامی تێبینی و پرسیارەکانی وەزارەتی دارایی عێراق تایبەت بە لیستی مووچەی مانگی چوار  و تەواوکردنی وردبینی لە لیستەکە، زیاتر لە هەفتەیەکە لە بەغدان و ئێستا تەنیا بڕیاری تەمویلی پارەکە ماوە.
 
 سەرچاوەیەکی باڵا لە وەزارەتی دارایی و ئابووری هەرێمی کوردستان ڕایگەیاند، "هەموو ڕێککارەکان تەواو بوون، تەیف سامی، لیستی مووچەی بینیوە و بەهەموو پێوەرێک دەبێت ئەمڕۆ تەمویلی مووچەی مانگی چوار بکرێت."
 
 بڕیارە لەگەڵ گەیشتنی پارە، دوای چەند کاتژمێرێک ڕاستەوخۆ خشتەی مووچە بڵاوبکرێتەوە، بەئەگەری زۆرەوە لیستەکە هاوشێوەی مانگی ڕابردوو دەبێت تەنیا ڕەنگە یەک دوو گۆڕانکاری کەمی تێدابکرێت.