هەواڵی خۆش بۆ فەرمانبەران هات

قایمقامی ناوەندیی هەولێر ئاشكرای دەكات، گۆڕانكاری لە ماستەرپلانی شاری هەولێردا دەكرێت و شوێنی دابەشكردنی زەویی فەرمانبەران و ئاڕاستە و سنووری نیشتەجێبوون و فراوانبوونی شاریش دەخاتە ڕوو.

نەبەز عەبدولحەمید، قایمقامی قەزای ناوەندیی هەولێر،  رایگەیاند: "به‌هۆی فراوانبوونی شاری هه‌ولێره‌وه،‌ گۆڕانكاری له‌ ماسته‌رپلانی شاردا ده‌كرێت و ده‌ست به‌جێبه‌جێكردنی گۆڕانكارییەكانیش دەكرێت."

ئاماژەی بەوەش دا: "هەندێک زۆن دەبنە شوێنی نیشتەجێبوون و هەندێک زۆن و ناوچەش بازرگانی و هەندێک شوێنی دیكەش دەبنە گەشتیاری، بێ گومان هەندی شوێنیش دەبنە کۆگا و كارگە."

قایمقامی هەولێر سەبارەت بە وردەكاریی ماستەرپلانەكە گوتی: "شەقامی کەرکووک و شەقامی مووسڵ و مەخموور دەبنە زۆنی کۆگا و كارگه‌كان و رێگای بەحرکەش تاوەكوو دەگاتە رێگای شەقڵاوە دەبێتە زۆنی نیشتەجێبوون و فراوانبوونی شار بەرەو ئەو ئاراستەیە دەڕوات."

سەبارەت بە دابەشكردنی زەویی فەرمانبەرانیش گوتی: "رەچاوی دابەشكردنی زەویی فەرمانبەران كراوە، زیاتر لە سنووری رێگای شەقڵاوە بۆ بەحركە دەبێت و لەو شوێنانە دابه‌ش دەکرێت، بەڵام ئەو وردەكارییە لای شارەوانییە."

بەپێی زانیارییەكان تاوەكوو ئێستا نزیكی 70 هەزار فەرمانبەر و كارمەندی حكوومی لە هەولێر، رەزامەندی تەرخانكردنی زەوییان بۆ دەرچووە.

قایمقامی هەولێر جەختی كردەوە، پرسی تەرخانكردن و دابینكردنی زەوی پەیوەستە بە خودی شارەوانییەكان.

ئاشكراشی كرد، زۆنی گەشتیاری لە رێگای کۆیە دەبێت، گوتیشی: "لە مۆنۆمێنت و بەرزاییەکانی کەسنەزانەوە تاوەكوو دەگاتە دەربەندی گۆمەسپان دەبێتە ناوچەی گەشتیاری."

جەختی كردەوە، لە ماستەرپلانەكەدا بەوردی رەچاوی هەموو بابەتێك و پێداویستییەكان و بە پلانی ورد كراوە و بەپێی پێداویستییەكانی ئێستای هەولێر دەبێت.